News Portal

  • अन्ततः सरिता गिरी सांसद पदबाट बर्खास्त, पार्टीको साधारण सदस्यबाट निष्कासित

    डबली संवाददाता२०७७ असार २३ गते
    ४५७ पटक

    काठमाडौं । अन्ततः सरिता गिरीमाथि कारवाही भएको छ । जारी गरेको अध्यावधि नक्साको विरोध गर्दै आएकी गिरीलाई समाजवादी पार्टीले निष्कासन गरेसँगै सांसद पदबाट बर्खास्त भएकी छन् ।

    मंगलबार समाजवादी पार्टील पार्टीका साधारण सदस्य समेत नरहने गरी निष्कासन गरेको छ । पार्टी महासचिव रामसहायप्रसाद यादवको नेतृत्वमा बनेको तीन सदस्यीय कार्यदलले गिरीलाई कारबाही गर्न सिफारिस गरेको थियो । मंगलबार बसेको पदाधिकारी बैठकले सिफारिसलाई अनुमोदन गरेको हो ।

    नेपालले भारतको मिचेको भूमि लिम्पियाधुरा, कालापानी र लिपुलेक क्षेत्र समेटिएको नक्साको विरोध गर्दै गिरीले संविधान संशोधनको विपक्षमा उभिएकी थिइन् । उनले नयाँ नक्सालाई निशान छापमा समेट्न गरिएको संविधान संशोधनको पक्षमा उभिन पार्टीको ह्वीपको समेत उलंघन गरेकी थिइन् । संविधान संशोधन विधेयकमा गिरीले दर्ता गराएको संशोधन फिर्ता लिन पार्टीले दिएको निर्देशनको समेत उलंघन गरेकी थिइन् ।

    नेपालको सांसद भएर नेपालकै विरुद्धमा बोलेपछि गिरीको चौतर्फी विरोध भएको थियो । गिरीले लिम्पियाधुरा, लिपुलेक–कालापानी क्षेत्र भारतको भएको भन्दै नसोधेर नक्सा जारी गरेको भन्दै संसद बैठकमै विरोध जनाएकी थिइन् । भारतको सहमति विना नक्सा जारी गर्न नहुने भन्दै संचारमाध्यमहरुमा अन्तरवार्ता दिँदै आएकी थिइन् ।

    गिरीलाई सांसद पदबाट बर्खास्त गर्नुपर्ने माग गर्दै सडकमा विरोध समेत भएको थियो । गिरीले नेपालको सार्वभौमिकताका विरुद्ध बोलेको भन्दै कारवाहीको माग गर्दैै प्रदर्शन समेत भएका थिए । युवाहरुको एक समूहले गिरीको घरमा कालो झण्डा समेत गाडेका थिए ।

    यसैबीच आफूमाथि षड्यन्त्रपूर्ण ढंगबाट पार्टीबाट निष्कासन गरिएको भन्दै गिरीले अदालत जाने बताएकी छन् । उनले समाजवादीको निर्णय अवैधानिक भएको भन्दै अदालत जाने संचारमाध्यमलाई प्रतिक्रिया दिएकी छन् ।

    पार्टीले निष्कासन गरेको आफूलाई औपचारिक रुपमा जानकारी नआएको र सामाजिक संजाल, संचारमाध्यमहरुबाट जानकारी पाएको बताउँदै भनिन्, “मलाई कारवाही गरिएको कुरा मैले औपचारिक रुपमा थाहा पाएकी छैन । सामाजिक संजाल र संचारमाध्यमहरुबाट जानकारी पाएकी छ्ु । यो कुरा सत्य हो भने मेराविरुद्ध षड्यन्त्र भयो, अदालत जान्छु ।”

    प्रतिकृया दिनुहोस्