काठमाडौं । नेपाल कोरोनामुक्त हुनेको संख्या पनि बढिरहेको छ । सोमबार कोरोना रोकथाम तथा नियन्त्रणको लागि लकडाउन जारी भएको १०५ दिन पुगेको छ । पछिल्ला दिनहरुमा संक्रमितहरुको संख्या तीब्र गतिमा बढिरहेको छ । तर, सोमबार भने संक्रमित भन्दा निको हुनेको संख्या बढी छ ।

स्वास्थ्य तथा जनसंख्या मन्त्रालयका अनुसार पछिल्लो २४ घण्टामा थप २६२ जनाले कोरोनासँग जितेका छन् । देशका विभिन्न अस्पताल र आइसोलेसन सेन्टरबाट उनीहरुलाई डिस्चार्ज गरिएको मन्त्रालयका प्रवक्ता डा. जागेश्वर गौतमले जानकारी दिए । सोमबारसम्म आउँदा नेपालमा कोरोना जित्नेको संख्या ६ हजार ८ सय ११ पुगेको छ ।

त्यसैगरी देशभर सोमबार थप १८० जनामा कोरोना संक्रमण भएको पुष्टि भएको छ । योसँगै नेपालमा कोरोना संक्रमितको संख्या १५ हजार ९६४ पुगेको छ । मन्त्रालयका प्रवक्ता डा. गौतमका अनुसार सबैभन्दा धेरै काठमाडौँमा संक्रमित भेटिएका छन् । काठमाडौँमा थप २४ जना, ललितपुरका २०, भक्तपुरमा १० सहित उपत्यकामा ५४ जनामा कोरोना संक्रमण पुष्टि भएको छ । पछिल्लो दिनहरुमो उपत्यकामा कोरोना तीब्र रुपमा फैलिरहेको छ ।

त्यसैगरी लमजुङका ११, सप्तरी, कैलाली, र कास्कीका ८÷८ जना, गोरखाका ७, बाग्लुङ, सर्लाही र रौतहटका ६÷६ जना, सिन्धुपाल्चोक, नवलपरासी, मकवानपुर, डडेलधुरा र झापाका ५–५ जनामा पनि संक्रमण पुष्टि भएको छ ।

प्रवक्ता गौतमका अनुसार प्युठान र काभ्रेका ४–४ जना, ओखलढुंगा, खोटाङ, चितवन र पाल्पाका ३–३ जना, सिराहा, सुनसरी, दोलखा, सिन्धुली र दाङका २–२ जना तथा नुवाकोट, चितवन, बारा, जाजरकोट, जुम्ला, धादिङ, नवलपुर, संखुवासभा, ताप्लेजुङ, अर्घाखाँची र उदयपुरका एकएक जनामा पनि कोरोना संक्रमण पुष्टि भएको छ ।

त्यसैगरी सोमबार थप एक जनाको कोरोनाका कारण ज्यान गएको पुष्टि भएको छ । नेपाल मा कोरोना कारण ३५ जनाको ज्यान गएको छ । सोमबार बागलुङका एकजनाको ज्यान गएको पुष्टि भएसँगै यो संख्या पुगेको हो । स्वास्थ्य तथा जनसंख्या मन्त्रालयका अनुसार बाग्लुङको मुसिखोला ३ का २९ वर्षीय ती पुरुषको असार २१ गते ढोरपाटन नगरपालिकाको क्वारेन्टिनमा ज्यान गएको मन्त्रालयका प्रवक्ता डा.जागेश्वर गौतमले जानकारी दिए ।

• फाइल फोट