काठमाडौं । नेपाल कम्युनिस्ट पार्टी (नेकपा) का दुई अध्यक्षबीचको वार्ता निष्कर्षविहीन भएको छ । अध्यक्ष तथा प्रधानमन्त्री केपी शर्मा ओली र अर्का अध्यक्ष प्रचण्डबीच बालुवाटारमा भएको वार्ता निष्कर्षविहीन भएको हो ।
शुक्रबार दिउँसो १२ बजेबाट सुरु भएको वार्ता २ बजेसम्म चलेको थियो । पार्टी एकताका साक्षीका रुपमा रहेका महासचिव विष्णु पौडेल र जनार्दन शर्मा पनि आजको बैठकमा बोलाइएको थियो । पार्टी एकताको भएको पहिलो सहमतिमा हस्ताक्षरकर्ता पौडेल र शर्माको सहभागितालाई महत्वपूर्ण रुपमा हेरिएको थियो । आजको छलफल महत्वपूर्ण हुने र दुबै अध्यक्षबीच पार्टीलाई फुटबाट बचाउन सहमति हुने भन्ने अनुमान गरिएको थियो तर भएन ।
दुबै अध्यक्षबीचको छलफल राम्रो भएको बैठकपछि पौडेलले आफू निकटका केही संचारकर्मीलाई बताएका छन् । पार्टीलाई फुटबाट जोगाउन भन्दै शनिबार विहान ११ बजेसम्मको लागि बैठक स्थगित गरेर नेताहरु छलफलमा जुटेका छन् ।
विहान मात्रै दोस्रो पुस्ताका नेताहरु मन्त्री क्वाटरमै छलफल गरेका थिए । उनीहरुले पार्टीलाई फुटबाट जोगाउने निष्कर्ष निकालेका थिए । स्थायी समिति बैठकमा प्रधानमन्त्री ओलीको राजिनामा मागेपछि तनाव उत्पन्न भएको थियो । पार्टी अध्यक्ष र प्रधानमन्त्री दुबैबाट राजिनामा मागेपछि ओलीले अध्यादेशको धम्की दिँदै संसद बैठक अन्त्य गरेपछि जारी बैठक स्थगित गरेर नेताहरु छलफल जुटेका छन् ।
