काठमाडौं । सत्तारुढ नेपाल कम्युनिस्ट पार्टी (नेकपा)को जारी स्थायी समिति बैठकमा धारणा राख्ने क्रम जारी छ । स्थायी समिति सदस्यहरुले सरकार र पार्टी नेतृत्वको चर्को आलोचना गरिरहेका छन् ।
जनताको अपेक्षाअनुसार काम गर्न नसकेको भन्दै प्रधानमन्त्री तथा पार्टी अध्यक्ष केपी शर्मा ओलीको चर्को विरोध गरिहरका छन् । हिजो बैठकमा अनुपस्थित रहेका ओली शनिबार (आज)को बैठकमा एक आए तर एकैछिनमा बाहिरिएको बताइएको छ । स्थायी समिति सदस्यहरुले गरेको आलोचना खेप्न नसकेर ओली बैठकबाटै बाहिरिएको नेताहरुले बताएका छन् ।
त्यसैगरी अधिकांश नेताहरु अमेरिकी मिलेनियम च्यालेन्ज कर्पोरेशन (एमसीसी) नेपालको हितमा नभएको भन्दै खारेज गर्ने धारणा राखिरहेका छन् । विवादित बुँदा संशोधन गरेर सहयोग लिन सकिने तर हुबहु पारित गर्नु राष्ट्र.घात हुने भन्दै नेताहरुले बरु खारेजी गर्नु बताएका छन् ।
बैठकस्थलबाटै केही नेताहरुले संचारकर्मीलाई दिएका जानकारीअनुसार ओली आधा घण्टा बसेर बाहिरिएका थिए । बैठक साढे ११ बजे सुरु भएको र ओली १२ नबज्दै बाहिरिएको बताइएको छ । अरु काम भएको भन्दै बैठक हलबाट प्रधानमन्त्री बाहिरिएको बताइएको छ ।
शुक्रबारको बैठकमा ओली अनुपस्थित रहेपछि बोल्ने स्थायी समिति सदस्यहरुले आक्रोस पोखेका थिए । हिजोको बैठकमा बोल्ने अधिकांश नेताहरुले प्रधानमन्त्री ओली आफू खुशी चलेको, पार्टीका संस्थागत निर्णयहरुलाई लत्याउँदै गएको, कोरोना रोकथाम तथा नियन्त्रण गर्न सरकार असफल भएको बताएका थिए ।
त्यसैगरी भ्रष्टाचार आरोपमा मुछिएका गोकुल बास्कोटालाई भारतीय दूतावासमा प्रधानमन्त्रीले पठाएको भन्दै चर्को आलोचना गरेका थिए । बैठकमा बोल्ने १८ जनाले नै सकारकारको आलोचना गरेका थिए ।
