कालिकोट । कालिकोट जिल्लाको सान्नी त्रिवेणी गाउँपालिकाका अध्यक्ष डम्बरबहादुर शाहीले गाडी खरिद गर्न छुट्याइएको रकमबाट कोरोना अस्पताल निर्माण निर्माण गर्न लागेका छन् । गाउँपालिकाले अध्यक्षको लागि गाडी खरिद गर्न छुट्याइएको रकम ‘कोरोना अस्पताल एण्ड आइसोलेसन सेन्टर’ निर्माणमा लगाएका हुन् । अस्पतालको निर्माणको काम करिबकरिब अन्तिम चरणमा पुगेको छ ।
“गाडी खरिदको लागि छुट्याइएको बजेटबाट कोरोना पीडितको उपचारको लागि अस्पताल तयार भइरहेको छ । कोरोना संक्रमित बिरामीलाई बाहिर उपचार गर्न पठाएर नयाँ गाडी चढ्नु उपयुक्त लागेन । अहिलेको आवश्यकता गाडीभन्दा कोरोनाले जुध्नु पहिलो प्राथमिकता भएकोले रकम त्यहाँ खर्च गरेका छौं” अध्यक्ष शाहीले बताए । गाडी खरिदको लागि ठेक्का गरिसकेर आशयपत्र समेत तयार भइसकेको थियो ।
गाडी किन्न अगाडि बढेका सबै प्रक्रिया रद्द गरेर रकमलाई कोरोना अस्पतालमा लगानी गरिएको अध्यक्ष शाहीले बताए । गाडी खरिदको लागि गाउँपालिकाले ४० लाख बजेट छुट्याएको थियो । त्यसमा केही बजेट थप गरेर ५५ लाखमा गाउँमै कोरोना संक्रमितको लागि सुविधा सम्पन्न अस्पताल निर्माण गर्न सुरु गरिएको थियो ।
बढीमा २० दिनको लक्ष्य राखेर अस्पताल निर्माण सुरु गरिएको तर लकडाउनका कारण निर्माण सामाग्रीको अभावले निर्माण कार्यमा केही ढिला हुन गएको अध्यक्ष शाहीले बताए । त्यस्तै लागत पनि बढेको अध्यक्ष शाहीले बताउँछन् ।
तत्कालि माओवादी केन्द्रबाट अध्यक्षमा निर्वाचित शाही आफै निर्माणमा जुटिरहेका छन् । “सम्भावित जोखिमसँग जुध्न रातदिन काम गरिरहेका छौं, अस्पताल निर्माणमा जुटेको जनशक्तिले रातदिन काम गरिरहेको छ । हाम्रो पहिलो प्राथमिकता अस्पताल निर्माण हो” उनले भने । गाउँपालिकामा अहिलेसम्म कोरोना संक्रमण नभेटिएको भन्दै शाहीले चाँडो अस्पताल निर्माण गरेर उपचारको लागि बाहिर जानु पर्ने बाध्यता अन्त्य गर्ने बताए ।
अस्पतालको निर्माण सामाग्री जितेगडामाबाट लोड गर्दै अध्यक्ष शाही
चिनियाँ गतिमा रात दिन काम भइरहेको अस्पतालको बाहिर निर्माण अन्तिम चराणमा पुगेको छ । त्यसैगरी उपकरण खरिदको काम पनि भइरहेको शाहीले बताए । उपभोक्ता समिति बनाएर गाउँहरुले रातदिन काम गरिरहेका छन् ।
