काठमाडौं । आजबाट संसदको बजेट अधिवेशन सुरु हुँदैछ । बैठक अपराह्न ४ बजेका लागि संसद भवन नयाँ बानेश्वरमा बोलाइएको छ । सामाजिक दूरी कायम गरी सांसहरुलाई बस्ने व्यवस्था गरिएको छ ।
नयाँवानेश्वरस्थित संसद बैठकमा सुरु हुने अधिवेशनमा कोरोना परीक्षण नगरिएका सांसदहरुलाई प्रवेश गर्न नदिइने भएको छ । त्यसैगरी सांसदहरुलाई सहयोगी नल्याउन समेत संसद सचिवालयले जानकारी गराएको छ ।
सचिवालयले कोरोना संक्रमणको जोखिमलाई ध्यानमा राखी सबै तयारी पूरा गरेको जनाएको छ । यसका लागि विहीबार दिनभर सांसदहरुको कोरोना परीक्षणका लागि स्वाब संकलन गरिएको थियो । सांसदहरुले कोरोना नभएको रिपोर्ट देखाएर मात्रै संसदमा प्रवेश पाउनेछन् ।
जनप्रतिनिधिहरु, कर्मचारी र पत्रकारहरु सबैलाई कोरोना संक्रमण भए नभएको यकिन गरेर मात्र संसद भवनमा प्रवेश दिइने व्यवस्था मिलाइएको सचिवालयले जनाएको छ ।
पत्रकारलाई कलम र डायरी लैजान प्रतिबन्ध लगाइएकको संसद सचिवालयले सूचना निकाली जनाएको छ । पत्रकारलाई कलम र डायरी लिन नदिनु संसदमा हुने गतिविधिलाई जनताबीच पुर्याउन नदिने कदमको रुपमा लिइएको छ ।
संवैधानिक व्यवस्थाअनुसार जेठ १५ गते बजेट ल्याउनै पर्ने हुन्छ । त्यस अगाडि पूर्व बजेट छलफल गर्नपर्ने भएकाले कोरोनाको जोखिमकै बीचमा पनि बैठक सञ्चालन गर्नु पर्ने सरकारलाई बाध्यता छ । बुधाबार बसेको मन्त्रिपरिषद् बैठकले पनि संसद र समितिका बैठकहरु बस्ने निर्णय गरेको थियो ।
