काठमाडौं । कोरोना भाइरस (कोभिड(१९) निको भएर घर फर्केका तीन जनामा पुनः देखिएको छ । निको भएर फुल बोकर घर फर्किएका काठमाडौँमा एक, रौतहट र वीरगञ्जमा पनि एकएक जनामा कोरोना पुनः देखिएको हो ।
स्वास्थ्य तथा जनसंख्या मन्त्रालयका अनुसार पेप्सिकोलास्थित सिनसिटी अपार्टमेन्टका ५८ वर्षका पुरुषमा पुनः कोरोना संक्रमणको पुष्टि भएको छ । उनलाई पुनः अस्पताल भर्ना गरिएको छ ।
५ चैतमा बेलायतबाट आएर सनसिटीमा बस्दै आएका उनीसँगै उनकी ८१ वर्षीया आमामा कोरोना संक्रमण भएको १ वैशाखमा पुष्टि भएको थियो । पाटन अस्पतालमा उपचार गरेर आमाछोरा ११ वैशाखमा घर फर्किएका थिए ।
तर एक सातापछि पुनः परीक्षणका लागि अस्पताल आएका ५८ वर्षका पुरुषको रिपोर्ट पोजेटिभ आएको बताइएको छ ।
त्यसैगरी मंगलबार नै पुनः कोरोना संक्रमण भएका रौतहटका एक युवक र भारतीय जमातीलाई अस्पताल भर्ना गरिएको छ ।
वीरगञ्जको छपकैयास्थित मस्जिदमा बस्दै आएका तीन जना जमातीमा ३० चैतमा र भारतबाट आएका रौतहटका युवकमा १ वैशाखमा संक्रमण पुष्टि भएको थियो ।
नारायणी अस्पतालमा दुई साता लामो उपचारपछि उनीहरुलाई १४ गते डिस्चार्ज गरिएको थियो । तीन पटक गरिएको परीक्षणको रिपोर्ट नेगेटिभ आएपछि डिस्चार्ज गरिएको थियो । तर पुनः स्वास्थ्य समस्या देखिएपछि अस्पताल पुगेका दुबै जनाको रिपोर्ट पोजेटिभ आएको हो । हाल दुबैलाई अस्पताल भर्ना गरिएको छ ।
