काठमाडौँ । सरकारले लकडाउनको अवधि बढाउने तयारी गरेको छ । भोलि रातिसम्मलाई लागु गरिएको लकडाउनको अवधि फेरि थप गर्ने तयारी भइरहेको छ ।
आजै मन्त्रिपरिषद बैठकले लकडाउनको अवधि बढाउने तयारी सरकारले गरेको छ । त्यसैको लागि प्रधानमन्त्री केपी शर्मा ओलीले आज दिउँसो २ बजे मन्त्रिपरिषद बैठक बोलाएका छन् । स्रोतका अनुसार लकडाउनको अवधि एक साता बढाउने सरकारको तयारी छ ।
सुदूरपश्चिममा थप तीन जनामा कोरोनाभाइरस देखिएपछि लकडाउनको अवधि बढाउने निष्कर्षमा सरकार पुगेको हो । हिजो मात्रै सुदूरपश्चिम सरकारले लकडाउनको अवधि बढाउन केन्द्र सरकारसँग अनुरोध गरेको थियो ।
यसअघि आइतबार बसेको कोभिड–१९ सम्बन्धी उच्चस्तरीय समितिको बैठकमा पनि लकडाउनको अवधि बढाउनेबारे छफलफ भएको थियो ।
शनिबार बसेको मन्त्रिपरिषद बैठकले लकडाउनलाई कडाई गर्ने निर्णय गर्दै एक प्रदेश र स्थानीय तहबाट अर्कोमा जान पूर्णरुपमा प्रतिबन्ध लगाउने निर्णय गरेको थियो ।
सरकारले चैत्र ११ गते एक साताको लागि लकडाउन गरेको थियो । फेरि ८ दिन थपेर भोलि अर्थात चैत्र २५ गते राति १२ बजेसम्म लकडाउनको अवधि बढाएको थियो ।
