काठमाडौँ । कोरोनाभाइरसलाई मध्यनजर गरेर सरकारले जारी गरेको लकडाउनको आज दोस्रो दिन । पहिलो दिन विहान प्रभाव निकै परेपनि दिउँसो बिस्तारै केही मानिसहरु सडकमा निस्केका थिए । प्रहरीले घर फर्कन भनेपनि केहीले अटेर गरेका थिए ।
प्रहरीले माइकिङ गरेर जानकारी गराएपनि केही व्यक्तिहरु मास्क नलगाई हिडेका देखिन्थे । सवारी साधान पनि केही मोटरसाइलक सडकमा देखिएका थिए । लकडाउन हेर्न भन्दै केही व्यक्ति बेफिक्री हिँडिरहेका थिए ।
दोस्रो दिन विहान सदाझैं विहानै केही व्यक्ति मर्निङ वाकमा निस्केका थिए ।
आज प्रहरीले कडा रुपमा कार्यान्वयन गर्ने तयारी गरेको छ । लकडाउन उलंघन गरे ६ महिनासम्म जेल सजाय हुने कानुनी प्रावधान छ । पहिलो दिन भएकोले हिजो केहीलाई सम्झाएर पठाएपनि आज भने कडा हुने जिल्ला प्रशासन कार्यालय काठमाडौँले बताएको छ ।
अत्यावश्यक वस्तुहरुको ढुवानी तथा वितरणमा कुनै समस्या नहुने बताइएको छ । खाद्यान्न, तरकारी, दुध, पानी, ग्याँस, औषधीलगायत अत्यावश्यक सेवा वा वस्तुको प्रवाहमा कुनै कमी नहुने तर उनीहरुले पनि सुरक्षाका उपाय र सतर्कता अपनाउन प्रशासनले जनाएको छ । पसलहरु निश्चित समयसम्म मात्रै खोल्न पाइने प्रशासनले यसअघि नै बताइसकेको छ ।
