News Portal

  • चीन-जापान, कोरियासहित पाँच देशका उडान रोक्न सर्वोच्चको आदेश

    २५१ पटक

    काठमाडौं । कोरोना भाइरस विश्वभर फैलिँदै गर्दा सर्वोच्च अदालतले अन्तर्राष्ट्रिय उडान रोक्न सरकारलाई आदेश दिएको छ । सर्वोच्चले चीन, कोरिया, जापानसहित कोरोना भाइरसको संक्रमण देखिएका देशहरुमा नेपालबाट हुने उडान र अन्य देशहरुबाट अवतरण रोक्न सोमबार आदेश दिएको हो ।

    सर्वोच्चले चीन, जापान, दक्षिण कोरिया, बहराइन र इरानबाट हुने उडान रोक्न आदेश दिएको छ । संक्रमण फैलिएका मुलुकबाट सोझै र ट्रान्जिट भएर त्रिभुवन अन्तर्राष्ट्रिय विमानस्थलमा अवतरण हुने उडानको अवस्था र परिस्थितिको सूक्ष्म मूल्यांकन गर्नसमेत सजग गराइएको छ ।

    त्यसैगरी ती देशका नागरिकलाई स्वास्थ्य परीक्षणबिना प्रवेशमा रोक लगाउन तथा शंकास्पद स्वदेशी तथा विदेशी नागरिकलाई तत्काल ‘आइसोलेसन’ र ‘क्वारेन्टाइन’ मा राखी छुट्टै उपचारको व्यवस्था मिलाउनसमेत सर्वोच्चले आदेश दिएको छ ।

    अधिवक्ता पूर्ण राजवंशीले दायर गरेको रिटको सुनुवाई गर्दै सर्वोच्चका न्यायाधीश तेजबहादुर केसीको एकल इजलासले प्रधानमन्त्री तथा मन्त्रिपरिषद् कार्यालय र स्वास्थ्य मन्त्रालयका नाममा आदेश दिएको छ । सरकारले पूर्वसावधानीका लागि आवश्यक व्यवस्था मिलाउन नसकेको राजवंशीले दाबी गरेका थिए ।

    सर्वोच्चले उत्तर र अन्य सीमाबाट नेपालमा प्रवेश गरिने स्थलमार्ग र त्रिभुवन अन्तर्राष्ट्रिय विमानस्थलबाट व्यक्तिहरू प्रवेश गर्ने नागरिक (विदेशी समेत) को अनिवार्य रूपमा कडाइका साथ स्वास्थ्य जाँचको प्रभावकारी व्यवस्था गर्न पनि सर्वोच्चले सरकारलाई आदेश दिएको छ ।

    “आमजनताको स्वास्थ्यसम्बन्धी राष्ट्रिय हितलाई ध्यानमा राखी केही दिन र महिनाका लागि अन्तर्राष्ट्रिय विमानस्थलमा अवतरण हुने अन्तर्राष्ट्रिय उडानमा रोक लगाउने” सर्वोच्चको अन्तरिम आदेशमा भनिएको छ ।

    प्रतिकृया दिनुहोस्