काठमाडौँ । विप्लव नेतृत्वको नेपाल कम्युनिस्ट पार्टीले एमसीसी सम्झौताविरुद्ध सडक संघर्षको घोषणा गरेको छ । उसले पुस १४ गतेदेखि पुस २० गतेसम्म देशव्यापी चरणबद्ध संघर्ष घोषणा गरेको हो ।
चौतर्फी विरोधको घेरामा रहेको मिलेनियम च्यालेन्ज कर्पोरेसन ‘एमसीसी’ रहेको नेपालको हितविरुद्धमा भएको भन्दै नेकपाले विरोध गर्दै आएको थियो । यसअघि पार्टीले विज्ञप्ति नै जारी गरेर सरकारले एमसीसी कार्यान्वयन नगर्न भनेको थियो ।
संयुक्त राज्य अमेरिकाले नेतृत्व गरेको हिन्द–प्रशान्त रणनीतिको अङ्गका रूपमा एमसीसी रहेको बताउँदै नेकपाले नेपालको हितविरुद्ध भएको भन्दै खारेज गर्न आग्रह समेत गरेको छ । अमेरिकाको आर्थिक, वैचारिक र राजनीतिक संकटलाई टार्न एमसीसी अगाडि ल्याएको नेकपाको ठहर छ ।
नेकपाले यही पुस १४ गतेदेखि २० गतेसम्म पहिलो चरणका संघर्षका कार्यक्रम घोषणा गरेको छ । जसमा मशाल जुलुस, विरोध सभादेखि नेपालस्थित अमेरिकी दूतावासमा ज्ञापानपत्र बुझाउनेसम्म रहेका छन् ।
यस्ता छन् संघर्षका कार्यक्रम
२०७६ पुस १४ गते देशव्यापी अन्तक्रिया कार्यक्रम
२०७६ पुस १६ गते देशव्यापी जुलुस प्रदर्शन
२०७६ पुस १८ गते देशव्यापी विरोध सभा
२०७६ पुस २० गते अमेरिकी दुताबासमा ज्ञापनपत्र दिने
