काठमाडौँ । नेपाल कम्युनिस्ट पार्टीले ठाटीकाँध गाउँपालिकाका अध्यक्ष धीरबहादुर शाहीलाई रिहा गरेको छ । भ्रष्टाचार गरेको, कमिसन खाने गरेको र पार्टीविरुद्ध लागेको भन्दै नेकपाले सोधपुछको लागि शाहीलाई शनिबार राति नियन्त्रणमा लिएको थियो ।
आवश्यक सोधपुछ सकिएको भन्दै नेकपाले छिमेकी जिल्ला कालिकोटको शुभकालिका गाउँपालिकाबाट आइतबार साँझ रिहा गरेको हो । शनिबार राति शाहीलाई नियन्त्रणमा लिने क्रममा उनको पन्ती इला बीच बाटोसम्म सँगै गएर फर्किएकी थिइन् । आवश्यक सोधपुछ गरेर फर्काइदिने भनेपछि इला बीचबाटै फर्केकी थिइन् ।
शाहीलाई अपरचित व्यक्तिहरुले सँगै लिएर गएको सूचना पाएलगत्तै दैलेख र कालिकोटबाट सो क्षेत्र आसपास व्यापक प्रहरी परिचालन गरिएको थियो । नेकपाले रिहा गरेपछि शाहीलाई प्रहरीले भेटाएको थियो । उनी जंगलको बाटो हुँदै फर्किदै थिए ।
‘उहाँविरुद्ध परेको उजुरीका आधारमा सोधपुछको लागि उहाँलाई नियन्त्रणमा लिएका थियौं, आवश्यक सोधपुछ पछि सकुशल रिहा गरिएको छ’ नेकपा एक नेताले अनलाइन डबलीसँग भने । सोधपुछ सकेर घरपरिवार तनावमा नहोस् भनेर अध्यक्ष शाहीलाई रिहा गरिएको र थप अनुसन्धान गरेर त्यसबारे पार्टीले निर्णय लिने ती नेताले बताए ।
