काठमाडौं । आज सागको समापन समारोहलाई मध्य नजर गर्दै काठमाडौं उपत्यकामा चल्ने सवारी साधनमा जोरविजोर प्रणाली लागु गरिएको छ ।
आज जोर नं.का मात्र सवारी साधन चलाउन पाइने छ । ट्राफिक व्यवस्थापन गर्न सजिलो होस् भन्ने उद्देश्यले जोर नं.का मात्र गाडी चलाउन पाउने व्यवस्था गरिएको ट्राफिक प्रहरीले जनाएको छ ।
महानगरीय ट्राफिक प्रहरी महाशाखाका अनुसार पुराना सवारी साधन चलाउन र हर्न बजाउन पनि निषेध गरिएको छ । ट्राफिकले ठुला मालवाहक सवारी साधनहरू रिङरोड भित्र प्रवेशमा रोक लगाएको छ ।
साथै कम भन्दा कम सवारी साधन निकाल्न पनि अनुरोध गरेको छ । १३ औं साग खेलकुदको भब्य समारोहबीच समापनको तयारी गरिएको छ ।
यही मंसिर १५ गतेदेखि काठमाडौं, पोखरा र जनकपुरमा चलेको साग मंगलबार साँझ दशरथ रंगशालामा विशेष समापन कार्यक्रमको आयोजना गरी सम्पन्न भएको घोषणा गरिनेछ ।
मध्याह्न १२ बजे सांसदहरुसँग विशेष फुटबल खेल्ने र दिउँसो ३ बजेदेखि पुरुष फुटबलको फाइनल खेल भएपछि विशेष समापन कार्यक्रम गरिने राष्ट्रिय खेलकुद परिषद (राखेप)का सदस्यसचिव रमेशकुमार सिलवालले जानकारी दिएका छन् ।
उनले मंगलबार नै खेलाडीहरुका लागि विशेष कार्यक्रम घोषणा गरिने बताएका छन् । समारोह समिति सचिव कुलबहादुर थापाले उदघाटनमा नेपालको कला र संस्कृति समेटेकोमा समापनमा भने नेपालको वीरताको गाथा प्रस्तुत गरिने बताए ।
करिब डेढ घण्टा चल्ने समापन समारोहमा सुरक्षा निकायका विभागीय टोलीहरु तथा विद्यालयका गरी ५ टोलीले विशेष प्रस्तुति दिने समापन अझ सशक्त हुने दाबी उनले गरे ।
