News Portal

  • न्यूजील्यान्डमा ज्वालामुखी विस्फोट, कम्तीमा ५ जनाको मृत्यु, कैयौँ घाइते

    ४१२ पटक

    काठमाडौं । न्यूजील्यान्डमा एउटा ज्वालामुखी विस्फोट भएपछि कम्तीमा ५ जनाको मृत्यु भएको छ भने केही मनिसहरु सम्पर्कविहीन भएको प्रहरीले जनाएको छ ।

    विस्फोट हुनु केही क्षणअघि ज्वालामुखीको मुखनजिकै पर्यटकहरू हिँडेको देखिएको बताइएको छ । प्रहरीका अनुसार २३ जनालाई उद्धार गरिएको छ । हताहत हुने व्यक्तिको संख्या बढ्न सक्ने बताइएको छ ।

    अहिले उक्त स्थानमा उद्धार गर्न निकै जोखिमपूर्ण मानिएको छ । उद्धारका लागि सेनाले प्रहरीलाई सघाइरहेको छ । उद्धारकर्मीहरूका अनुसार घाइतेमध्ये केही गम्भीर अवस्थामा छन् । उनीहरूको शरीर पोलेको छ ।

    देशको उत्तरपूर्वी भेगको ह्वकारी पनि भनिने ह्वाईट आईल्यान्ड नामक टापुमा ज्वालामुखी विस्फोट भएको हो । उक्त टापु निजी स्वामित्वमा रहेको छ र पर्यटन गन्तव्यस्थल मानिएको छ । उक्त स्थानमा सक्रिय ज्वालामुखीहरू छन् ।

    न्यूजील्यान्डको क्रूज असोसिएशनका अनुसार एउटा पर्यटक बोकेको डुङ्गा पनि प्रभावित भएको छ । उद्धारकार्यका लागि नजिकैको ह्वकाताने नगरमा उद्धारकर्मीहरू परिचालित छन् । विस्फोट भएको समयमा उक्त ह्वाईट आईल्यान्डमा दर्जनौँ मानिसहरू रहेका थिए ।

    सन् २००१ यता त्यहाँ भएको यो पहिलो ज्वालामुखी विस्फोट हो । प्रधानमन्त्री जसिन्डा आर्डर्नले सो घटनालाई निकै ठूलो भनेकी छिन् । उद्धार निकायले वरपरको क्षेत्र जोखिमपूर्ण भएको जनाएको छ । माछा मार्ने व्यवसायमा संलग्न एक स्थानीयवासीले विस्फोटपछि सो क्षेत्रमा च्याउ जस्तो आकारमा विशाल धूँवाको मुस्लो देखिएको बताएका छन् ।

    लाईभ फीडबाट प्राप्त फोटोमा विस्फोट हुनुभन्दा केही मिनेट अगाडि त्यहाँको क्रेटर देखिन्छ । विस्फोट हुनुभन्दा केही क्षण अगाडि ह्वाईट आईलयान्डको क्रेटरको घेरा छेउछाउमा पर्यटकहरू घुमिरहेको देखिन्थ्यो । सक्रिय ज्वालामुखी रहेको भए पनि ह्वाईट आईल्यान्ड पर्यटकीय स्थल हो । त्यहाँ दैनिक पर्यटकीय भ्रमण कार्यक्रम एवं हवाई भ्रमण हुने गर्छ ।

    प्रतिकृया दिनुहोस्