कैलाली । सुदूरपश्चिम प्रदेश सरकारको आयोजनामा सुदूरपश्चिम प्रदेशको धनगढीमा वित्तीय सम्मेलन सुरु भएको छ ।

वित्तीय सम्मेलनको उदघाटन नेपाल कम्युनिस्ट पार्टी (नेकपा) का अध्यक्ष पुष्पकमल दाहाल (प्रचण्ड) ले गरेका छन् । ‘वित्तीय पहुँचको सुनिश्चितता, प्रदेश सरकारको प्रतिवद्धता’ भन्ने नाराका साथ प्रदेशमा वित्तीय पहुँचको सुनिश्चितता गर्ने उद्देश्यले आर्थिक मामिला तथा योजना मन्त्रालयले सम्मेलनको आयोजना गरेको हो ।

प्रदेशलाई समृद्धिको बाटोमा लैजाने उद्देश्यले सरकारले वित्तीय सम्मेलन गर्न लागेको सुदूपश्चिम सरकारले जनाएको छ ।

वित्तीय पहुँचको सुनिश्चतता गर्ने, ससानो बचत परिचालन मार्फत पुँजी निर्माण गर्ने, प्रदेशवासीलाई आधुनिक बैंकिङ प्रणालीमा आबद्ध गर्ने र वित्तीय पहुँचका माध्यमबाट आर्थिक विकास गरी प्रदेशलाई समृद्धिको मार्गमा अघि बढाउने सम्मेलनको उद्देश्य रहेको छ ।