काठमाडौं । नेपाल कम्युनिष्ट पार्टी (नेकपा) को सचिवालय बैठक अध्यक्ष पुष्पकमल दाहाल ‘प्रचण्ड’ को अध्यक्षतामा पहिलो पटक बसेको छ ।
नेकपाको बैठक पार्टी कार्यालय धुम्बाराहीमा बसिरहेको छ । पार्टी हाँक्ने जिम्मेवारी पाएपछि उनले पहिलो पटक बैठक बोलाएका हुन् । प्रधानमन्त्री केपी ओलीसँग सहमति लिएर सचिवालय बैठक बोलाएको नेताहरूले बताएका छन् । दुई अध्यक्षबीच मंसिर ४ गते ओलीले सरकार र दाहालले पार्टी हाँक्ने सहमति भएको थियो ।
बिहान ९ बजेका लागि बोलाइएको सचिवालय बैठक नियमित बैठककै रूपमा बोलाइएको हो । २०७५ जेठ ३ मा तत्कालीन एमाले-माओवादी केन्द्रबीच पार्टी एकता भएयता दाहालले पार्टीमा आफू पनि अध्यक्ष रहेको महसुस गर्न नसकेको बताउँदै आएका थिए ।
पार्टी बैठकको अध्यक्षता र सरकारको नेतृत्वसमेत ओलीले गरेपछि नेकपाभित्र दुई अध्यक्षको कार्य विभाजनको विषय टुंगो लगाइएको थियो । विधान अनुसार ३-३ बैठकमा छलफल हुने र स्थायी कमिटी बैठकको मिति र एजेण्डाबारे छलफल हुने नेताहरुले बताएका छन् ।
बैठकमा उपनिर्वाचनको समिक्षा तथा प्रधानमन्त्रीको स्वास्थ्य अवस्थालगायतका विषयमा छलफल भइरहेको बताइएको छ ।
