बाँके । हतियारसहित पक्राउ परेका तरुण दल नेपालगञ्जका नगर सभापति सन्दीपजङ्ग शाह पुर्पक्षका लागि कारागार चलान भएका छन् ।
जिल्ला अदालत बाँकेले सोमबार उनलाई पुर्पक्षका लागि कारागार चलान गर्न आदेश दिएको छ । प्रहरीका अनुसार शाहसँगै पक्राउ परेका अन्य ३ जनालाई भने १ लाख ५० हजार धरौटी माग गरिएको छ ।
सरकारी वकिल कार्यालयले गत शुक्रबार नगर सभापति शाहसहित ४ जनालाई हातहतियार तथा खरखाजना मुद्दामा ५ वर्ष सजाय माग गर्दै जिल्ला अदालतमा मुद्दा दर्ता गरेको थियो । उनीहरुविरुद्धको मुद्दामा थुनछेक बहस सकिएपछि सोमबार अदालतले शाहलाई पुर्पक्षका लागि थुनामा पठाउन आदेश दिएको हो ।
उनीसहित पक्राउ परेका माधव नेपाली, प्रितम थापा र यामबहादुर बुढामगरलाई भने धरौटीमा रिहा गर्न आदेश दिएको छ । गत कात्र्तिक १४ गते राति साढे ८ बजे बाँकेको जानकी गाउँपालिका–६ गनापुरमा रहेको नमस्ते भिलेज रिसोर्टबाट अमेरिकन आधुनिक पेस्तोल र गोलीसहित तरुण दलका नगर सभापति शाहलाई प्रहरीले पक्राउ गरिएको थियो ।
