काठमाडौं । आज सिमा अतिक्रमणको विरोधमा नेपाल विद्यार्थी संघले प्रदर्शन गरेको छ ।
पशुपति क्याम्पस चावहिलबाट सुरु भएको विरोध प्रदर्शन चावहिल चोक, गौशालासहित विभिन्न ठाउँको परिक्रमापछि कोणसभामा परिणत भएको हो ।
प्रदर्शनका सहभागीहरुले भारतले नक्सा सच्याउनुपर्ने माग राखेका छन् । विद्यार्थीहरुले भारतले सार्वजनिक गरेको नयाँ राजनीतिक नक्सामा कालापानी, लिम्पियाधुरा र लिपुलेकलाई भारतीय सीमाभित्र पारेको भन्दै त्यसको चर्को विरोध गरेका हुन् ।
नेविसंघले नक्सा नसच्चाए आन्दोलन चर्काउने चेतावनी दिँदै सरकारको ध्यानाकर्षणसमेत गराएको छ । भारतले सिमा मिच्दासमेत मुकदर्शक भएको, कुटनीतिक पहल नगरेको भन्दै सरकारविरुद्ध पनि चर्को नारावाजी गरेको छ ।
विद्यार्थीको आन्दोलनको कारण चावहिल, गौशाला क्षेत्रमा केही बेर यातायात अवरुद्ध भएको थियो ।
