काठमाडौँ । अनेरास्ववियु (क्रान्तिकारी) का अध्यक्ष आलोक रायमाझीलाई प्रहरीले गिरफ्तार गरेको छ । भारतले नेपालीभूमीमाथि गरेको अतिक्रमणविरुद्ध गरिएको प्रदर्शनबाट प्रहरीले रायमाझीलाई गिरफ्तार गरेको हो ।
नेकपा (माओवादी केन्द्र) निकट अखिल क्रान्तिकारीका अध्यक्ष रायमाझीलाई प्रहरीले प्रदर्शनकैबीचबाट बबरमहलबाट गिरफ्तार गरेको छ । भारतले नेपालीभूमी समेटेर तयार गरेको राजनीतिक नक्साको खारेजीको माग गर्दै विद्यार्थीहरुले माइतीघरमा विरोध प्रदर्शनको आयोजना गरेका थिए ।
विप्लव नेतृत्वको नेपाल कम्युनिस्ट पार्टी र माओवादी केन्द्र निकट अखिल क्रान्तिकारीको आह्वानमा आइतबार गरेको विरोध र्याली माइतीघरबाट नयाँवानेश्वर जाँदै गर्दा बबरमहलबाट प्रहरीले रायमाझीसँगै दर्जनभन्दा बढी विद्यार्थीलाई गिरफ्तार गरेको थियो ।
प्रहरीले नेकपा निकट अखिल क्रान्तिकारीमा आवद्ध दर्जनभन्दा बढीलाई विद्यार्थीहरुलाई गिरफ्तार गरेको छ । विरोध प्रदर्शनको अगुवाई गरिरहेका नेताहरुलाई प्रहरीले गिरफ्तार पछी विद्यार्थीहरु अक्रोसित भएर सरकारविरुद्ध नाराबाजी गरिरहेका थिए ।
कालापानी, लिम्पियाधुरा हाम्रो हो, भारतीय नक्सा खारेज गर भन्दै नाराबाजी गरिहरको विद्यार्थीहरु प्रहरी हस्तक्षेपछि सरकार र प्रहरीविरद्ध नाराबाजी सुरु गरेका थिए ।
गिरफ्तार गरिएका विद्यार्थीहरुलाई साँझसम्म पनि रिहा गरिएको छैन । उनीहरुलाई प्रहरी प्रभाग सिंहदरबारमा राखिएको छ ।
यसैबीच माओवादी केन्द्रले विज्ञप्ति निकालेर विद्यार्थीमाथि गरिएको हस्तक्षेपप्रति आपत्ति जनाएको छ । पार्टी सचिव राजन तिमिल्सिनाले विज्ञप्ति जारी गरेर विरोध प्रदर्शनमाथि बल प्रयोग गरेर सरकारले भारतको दलाली गरेको बताएका छन् ।
गिरफ्तार विद्यार्थीहरुलाई रिहा नभए सरकारविरुद्ध संघर्षका कार्यक्रम घोषणा गर्ने चेतावनी समेत दिएका छन् ।
