News Portal

  • ‘लिम्पियाधुरा कालापानी- हाम्रो हो’ भन्दै विद्यार्थीले घेरे भारतीय दूतावास

    ३३८ पटक

    काठमाडौं । भारतले कालापानी-लिम्याधुरा क्षेत्रलाई आफ्नोमा पारेर नयाँ नक्सा सार्वजिनक गरेपछि नेपालमा चर्को विरोध भइरहेको छ । राजनीतिक दल र तिनका भातृ संगठनसहित आम नेपाली विरोधमा उत्रेका छन् ।

    प्रतिबन्धित नेकपादेखि सत्तारुढ (नेकपा) का भातृ संगठनहरु विरोधमा उत्रेका छन् । घरेलु विषयमा मतमतान्तर भएपनि नेपालीभूमीको सवालमा सबै एक ठाउँमा उभिएका छन् । सत्तारुढ (नेकपा) ले विरोधका कार्यक्रम घोषणा नगरेपनि उसका भातृ संगठन अनेरास्ववियू भने सडकमा निस्केको छ ।

    विप्लव नेतृत्वको नेकपाले एकहप्ते संघर्षका कार्यक्रमसहित सडकमा उत्रिएको छ । पार्टीका महासचिव विप्लवले विज्ञप्ति निकालेर पार्टीका सबै निकायलाई संघर्षमा उत्रिन निर्देशन दिँदै सबै राष्ट्रवादी नेपालीलाई भारतीय अतिक्रमको विरुद्धमा बोल्न अपील समेत गरेका थिए ।

    यसबारे सरकारले पनि आफ्नो धारण सार्वजनिक गरेको छ । सरकारका प्रबक्ता गोकुल बास्कोटाले भारतले सार्वजनिक गरेको नयाँ नक्सा मान्य नहुने बताए । सरकारले कुटनीतिक पहल गरिरहेको समेत दाबी गरेका थिए ।

    त्यसैगरी (नेकपा) का अध्यक्ष प्रचण्डले पनि भारतको हेपाह प्रवृति कायमै रहेको भन्दै नेपालीभूमी समेटेर तयार गरिएको नक्सा खारेजीको माग गरेका छन् ।

    यसैबीच सत्तारुढ (नेकपा) निकट अनेरास्ववियूले शुक्रबार भारतीय दूतावासमा धर्ना दिएको छ । उसले नेपालीभूमीमाथि अतिक्रमण गरिएको बताउँदै विरोध गरेको छ । दूताबास अगाडि धर्ना दिँदै विद्यार्थीहरुले भारतविरुद्ध नाराबाजी समेत गरेका छन् ।

    विद्यार्थीहरुले भारतले सार्वजनिक गरेको नक्सा खारेज नगरे कडा संघर्षका कार्यक्रम सार्वजनिक गर्ने चेतावनी दिए।

    प्रतिकृया दिनुहोस्