काठमाडौं । भारतले नेपाली भूमी कालापानी–लिपुलेक अतिक्रमणविरुद्ध नेकपा (क्रान्तिकारी माओवादी) विरोध प्रदर्शनमा उत्रिएको छ । पार्टीका महासचिव मोहन वैद्यले एक विज्ञप्ति जारी गरेर भारतले हालै सार्वजनिक गरेको नक्सामा नेपालीभूमी कालापानी र लिपुलेक क्षेत्र आफ्नोभूमीमा गाभेको भन्दै विरोध गरेका छन् ।
महासचिव वैद्यले भारतको नक्सा सार्वजनिक गर्दै नेपालीभूमीमाथि नांगो हस्तक्षेप गरेको बताए । उनले विरोधमा उत्रिन अपील समेत गरेका छन् ।
“भारत सरकारद्वारा हालै सार्वजनिक गरिएको नयाँ नक्सामा पहिलेदेखि अतिक्रमण गर्दै आएको नेपालको लिम्पियाधुरादेखि लिपुलेकसम्मको समग्र कालापानी क्षेत्रमा पर्नेे भूभागलाई भारतमा गाभिएको छ । यो नेपालको राष्ट्रिय स्वाधीनता, सार्वभौमिकता र नेपाली भूभागमाथि गरिएको नाङ्गो अतिक्रमण हो” वैद्यले विज्ञप्तिमा भनेका छन् । उनले सम्पूर्ण देशभक्त नेपालीहरु संवेदनशील र गम्भीर बन्न जरुरी रहेको समेत बताएका छन् ।
भारतले गरेको अतिक्रमणविरुद्ध आफ्नो पार्टी संघर्षमा उत्रिएको भन्दै नेपालको सार्वभौमिताको पक्षमा दह्रोसंग उभिन र यसबारे तुरुन्तै आवश्यक कूटनीतिक पहल अगाडि बढाउन नेपाल सरकारसित जोडदार माग समेत गरेका छन् ।
यसैबीच क्रान्तिकारी माओवादीको मोर्चा देशभक्त जनगणतान्त्रिक मोर्चाले आज दिउँसो विरोध प्रदर्शन गर्ने भएको छ । बुधबार दिउँसो ३ बजे काठमाडौँको शान्तिबाटिकामा विरोध प्रदर्शन गर्न लागेको मोर्चाले जानकारी दिएको छ ।
विरोध कार्यक्रमलाई मोर्चाका महासचिव परी थापालगायतका नेताहरुले सम्बोधन गर्ने बताइएको छ ।
- फाइल फोटो
