काठमाडौं । अर्थमन्त्री डा. युवराज खतिवडा बुधबार दिल्ली पुगेका छन् । बिहीबारदेखि सुरु हुने इन्डिया इकोनोमिक समिट-२०१९(भारत आर्थिक सम्मेलनमा भाग लिन दिल्ली पुगेका हुन् । अहिले उनी नेपाली दूतावासमा रहेका छन् ।
उनले आफ्ना समकक्षी भारतीय वित्तमन्त्री निर्मला सीतारमणसँग भेट गर्ने कार्यक्रम रहेको छ । बिहीबारदेखि सुरु हुने २ दिने सम्मेलनमा भाग लिन पुगेका उनी शनिबार काठमाडौँ फर्किने कार्यक्रम छ ।
शुक्रबार दिउँसो ‘दक्षिण एशियाली मुलुकको आर्थिक दृष्टिकोण’ विषयमा हुने प्यानल डिस्कसनमा भाग लिनका लागि आमन्त्रित उनले सम्मेलनको बिहीबार र शुक्रबारको अधिकांश सत्रमा भाग लिने छन् ।
अर्थमन्त्रीको जिम्मेवारी सम्हालेपछि खतिवडा दोश्रो पटक दिल्ली गएका छन् । यस अघि इन्डिया फाउन्डेसनले १४-१६ मार्च २०१८-३० फागुन-२ चैत्र २०७४ मा आयोजना गरेको ‘प्रतिआतंकवाद सम्मेलन २०१८’मा भाग लिन एक दिनका लागि उनी दिल्ली पुगेका थिए ।
त्यसको उद्घाटन सत्रमा मुख्य वक्ताको रुपमा उनले सम्बोधन गरेका थिए । यही अक्टोबर ३-४ मा हुन लागेको सम्मेलन जेनेभास्थित विश्व आर्थिक मंच–वर्ल्ड इकोनोमिक फोरम, भारत सरकारको वाणिज्य तथा उद्योग मन्त्रालय तथा भारतीय उद्योग परिसंघ (सीआईआई) को सहकार्यमा हुन लागेको हो ।
‘इनोभेटिंग फर इन्डियाः स्ट्रेन्थिंग साउथ एशिया, इम्प्याक्टिंग दि वर्ल्ड’, समिटको नारा रहेको छ । डब्लुईएफका अनुसार समिटमा ४ वटा विषयगत स्तम्भमा क्षेत्रीय महत्वका रणनीतिक मुद्दाहरुलाई सम्बोधन गरिनेछ ।
नयाँ भुराजनीतिक यथार्थ र नयाँ सामाजिक, परिस्थिति र प्राविधिक प्रणाली दक्षिण एशियाली मुलुक तथा आसियान सदस्य मुलुकहरुबीच समन्वय र सहकार्य अभिवृद्धि गर्न यो सम्मेलन केन्द्रित रहने बताइएको छ ।
