News Portal

  • चिनियाँ कम्पनीलाई बाहिरी चक्रपथको जिम्मेवारी दिने निर्णय

    २१५ पटक

    काठमाडौं । लगानी बोर्डको आज (सोमबार) को ४० औं बैठकले काठमाडौं बाहिरी चक्रपथ परियोजनाको जिम्मेवारी ‘चिनियाँ कम्युनिकेसन पूर्वाधार कम्पनी’ लाई दिने निर्णय गरेको छ ।

    प्रधानमन्त्री केपी शर्मा ओलीको अध्यक्षतामा सिंहदरबारमा सम्पन्न बैठकले प्रस्ताव पेस गरी संक्षिप्त सूचीकरण (सर्ट लिस्ट) मा परेकामध्ये मापदन्ड र मूल्यांकनका आधारमा उक्त कम्पनीलाई जिम्मेवारी दिएको हो ।

    बैठकले सार्वजनिक निजी साझेदारी अवधारणा अन्तर्गत निजगढ अन्तर्राष्ट्रिय विमानस्थलको परियोजना विकास गर्न जुरिच एअरपोर्ट इन्टरनेसनल (एजी) लाई जिम्मेवारी दिने निर्णय पनि गरेको छ । दुवै परियोजनाका लागि ती कम्पनीले ४५ दिनभित्र परियोजना विकासको प्रस्ताव पेस गर्नुपर्ने छ ।

    बैठकले पश्चिम सेती तथा एसआर ६ संयुक्त जलविद्युत परियोजना, तल्लो अरुण जलविद्युत परियोजनाका लागि प्रस्ताव पेस गर्नेमध्ये संक्षिप्त सूचीकरण छनोटका लागि ऊर्जा, जलस्रोत तथा सिँचाइमन्त्री वर्षमान पुनको संयोजकत्वमा अलग–अलग समिति गठन गरेको छ ।

    बैठकमा प्रधानमन्त्री ओलीले काठमाडौं उपत्यकाको यातायात व्यवस्थापन र सुधारबारे हालसम्म भएका विभिन्न अध्ययन, अवस्था, त्यसका लागि लगानी गर्न इच्छुकको सूचीसहित सुझाव दिन सम्बन्धित मन्त्रालय र निकायलाई निर्देशन दिए । उनले भने-‘सबै काम समयमा योजनाबद्ध रुपमा सम्पन्न हुनुपर्छ । मन्त्रालय र निकायले एक अर्कामा समन्वय गर्नुपर्छ । त्यसका लागि चाँडो प्रतिवेदन प्राप्त होस् ।’

    बैठकमा बोर्डका प्रमुख कार्यकारी निर्देशक महाप्रसाद अधिकारीले अघिल्लो बैठकका निर्णय र प्रगतिबारे प्रतिवेदन प्रस्तुति गरे ।

    प्रतिकृया दिनुहोस्