काठमाडौं । नेपाल कम्युनिस्ट पार्टीले चितवन मेडिकल कलेज (सिएमसी)ले विद्यार्थीका माग पूरा नगरे हस्तक्षेप गर्ने बताएको छ । जायज माग पूरा गरेर समस्या समाधान गर्नुको साटो विषयान्तर गरेको भनेको छ ।
नेकपाका प्रबक्ता प्रकाण्डले शुक्रबार साँझ विज्ञप्ति जारी गरेर पार्टीसँग जोडेर विद्यार्थीमा दमन गरिएको बताएका छन् । उनले कलेज प्रशासनले आफ्ना कमजोरी ढाकछोप गर्ने षड्यन्त्र गरिरहेको बताएका छन् ।
“चितवन जिल्लास्थित ‘चितवन मेडिकल कलेज (सिएमसी)’मा अध्ययनरत विद्यार्थीहरुले आफ्ना जायज मागहरु राखेर शान्तिपूर्ण र वैधानिक संघर्ष गर्दै आएका छन् । कलेज प्रशासनले विद्यार्थीका जायज माग सम्बोधन गर्नुको सट्टा समस्यालाई विषयान्तर गर्दै हाम्रो पार्टीसँग जोडेर विद्यार्थीहरुमाथि दमन गरेर आफ्नो कमजोरी र बदमासी ढाकछोप गर्ने षड्यन्त्र गरिरहेको छ । केही दिनअधि कलेज प्रशासनद्वारा जारी विज्ञप्तिले त्यसको पुष्टि गर्दछ” प्रकाण्डद्वारा जारी विज्ञप्तिमा भनिएको छ ।
विज्ञप्तिमा प्रबक्ता प्रकाण्डले विद्यार्थीका माग पूरा गर्न अनुरोध गर्दै भनेका छन्, “समस्याको विषयान्तर नगर्न र आफ्ना विद्यार्थीको संविधान प्रदत्त, कानुनसम्मत र न्यायपूर्ण माग पूरा गर्न अनुरोध गर्दछौं । अन्यथा समस्यामाथि हस्तक्षेप गर्न पार्टी बाध्य हुनेछ ।” उनले संविधानमा स्वास्थ्य शिक्षा अध्ययनमा ७५ प्रतिशत छात्रवृत्ति दिनुपर्ने कानुनी व्यवस्था भएपनि माफिया र दलालहरुले त्यसलाई लत्यार लाखौं अवैध असुली गरिरहेको बताएका छन् ।
सिएमसीमा अध्ययनरत विद्यार्थीहरु केही दिन आन्दोलन गरिरहेका छन् ।
विज्ञप्तिको पूर्णपाठ
