काठमाडौं । सरकारले संसदमा दर्ता गराएको मिडिया काउन्सिल विधेयकविरुद्ध पत्रकारहरुले मानव साङ्लो बनाएर प्रदर्शन गरेका छन् । नेपाल पत्रकार महासंघको आह्वानमा पत्रकारहरुले काठमाडौंको बबरमहलदेखि माइतीघरसम्म मानव साङ्लो बनाएर विरोध गरेका हुन् ।
पत्रकार महासंघका अध्यक्ष गोविन्द आचार्यसहित पूर्वपदाधिकारी र सम्पादक तथा पत्रकारहरुले मिडिया काउन्सिल विधेयक फिर्ता गर्नुपर्ने माग गरेका थिए । उनीहरुले विधेयकले स्वतन्त्र प्रेसको हत्या गर्न लागेको भन्दै आँखामा कालो पट्टी बाँधेका पत्रकारहरुले स्वतन्त्र प्रेसको पक्षमा नाराबाजी गरेका थिए ।
सरकारले पत्रकारको आन्दोलनको बेवास्ता गरेपछि महासंघकै अगुवाईमा अन्तर्राष्ट्रिय मिडिया मिसन नेपाल बोलाउनु पर्ने धारण बक्ताहरुले राखेको महासंघका केन्द्रीय सदस्य जन्मदेव जैसीले जानकारी दिए ।
स्वतन्त्र प्रेसका लागि विगतमा पनि मिशन टोली नेपाल आएको बताउँदै सरकारले विधेयक फिर्ता नलिए फेरिपनि मिशन बोलाउनु पर्ने पत्रकार महासंघका पुर्वअध्यक्ष सुरेश आचार्यले बताए ।
