नेपालगञ्ज । नेकपाका वरिष्ठ नेता माधवकुमार नेपालले सरकारलाई विवादास्पद निर्णयहरु नगर्न सुझाव दिएका छन् ।
प्रेस संगठन, बाँकेले आज (शनिबार) नेपालगञ्जमा आयोजना गरेको पत्रकार भेटघाटमा उनले राय सुझाव लिएर काम नगर्दा सरकारका कतिपय निर्णय विवादमा परेको बताए ।
मिडिया काउन्सिल विधेयक त्यसको उदाहरण भएको बताउँदै उनले यो विधेयकलाई सबै पक्षको राय सुझाव लिएर संशोधन गर्न सुझाव दिए । विधेयकमा कहाँकहाँ सुधार्न सकिन्छ । सबैको सुझाव लिएर संशोधन गरेर सर्वस्वीकार्य बनाउन जोड दिए । उनले भने, ‘सरकारले काम गर्न खोजेको छ । कामहरु पनि भएका छन्, त्रुटी पनि भएका छन्, कमिकमजोरीलाई सुधारेर अघि बढ्न जरुरी छ ।’ पार्टीभित्र विधि र पद्धति बसाउन आफूले खबरदारी गरिरहेको बताए ।
‘तपाईलाई पार्टीमा अध्यक्षद्वयले पेलेका हुन् ?’ भन्ने प्रश्नमा उनले आफू कसैसँग नडराउने बताए । ‘पार्टीमा विधि र पद्धति बसाउनु पर्छ भनेर मैले खबरदारी गरिरहेको छु । माधव नेपाल कसैसँग डराउँदैन, विधि र पद्धतिको निम्ति दृढताका साथ उभिन्छ, बिग्रेको बानी सपार्न गाह्रो हुँदो रहेछ’–उनले भने ।
