काठमाडौं । लागूऔषधसहित प्रहरीले ३ जनालाई पक्राउ गरेको छ ।
पक्राउ परेका तीनै जना र बरामद लागूऔषधसहित जिल्ला प्रहरी कार्यालय हेटौंडाले पत्रकार सम्मेलन गरेर आज (बिहीबार) सार्वजनिक गरेको छ ।
प्रहरीले पूर्वपश्चिम राजमार्गस्थित हेटौंडा उपमहानगरपालिका-३ तीनताप्केबाट २ सय १२ केजी गाँजासहित महोत्तरी बर्दिवास-११ का ३६ वर्षिय राजजस यादव र १९ वर्षिय उज्वल गुर्मछान मगरलाई बुधबार राति पक्राउ गरेको हो ।
मनहरीबाट हेटौंडातर्फ आउँदै गरेको ना ३ च ३७६९ नम्बरको पिकअपलाई प्रहरीले तीनताप्केमा रोकेर जाँच गर्ने क्रममा त्रिपालले छोपेको अवस्थामा गाँजा फेला परेको प्रहरीको भनाई छ ।
पिकअपको ढालामा राखिएको त्रिपालमा ३० वटा प्लाष्ट्रिकको पोकामा प्याक गरेको गाँजा लुकाइएको अवस्थामा फेला परेको हो । प्रहरीले पिकअप, गाजाँसहित २ जनालाई पक्राउ गरेको छ ।
त्यसैगरी हेटौंडा उपमहानगरपालिका–१५ रातोमाटेस्थित इलाका प्रहरी कार्यालयले लागूऔषधसहित चितवन राप्ति नगरपालिका–४ का ३७ वर्षिय लक्ष्यबहादुर राईलाई पक्राउ गरेको छ ।
वीरगन्जबाट हेटौंडातर्फ आउँदै गरेको ना ७ ख ९१६५ नम्बरको बस रोकेर प्रहरीले जाँच गर्ने क्रममा उनको साथबाट नाइट्रोभेट १२७ ट्याबलेट, १० एम्पुल डाईजेपाम, १० एम्पुल ब्युनोर्फिन र १० एम्पुल फेनार्गन बरामद गरेको छ ।
