सुर्खेत । कर्णाली प्रदेशका मुख्यमन्त्री महेन्द्रबहादुर शाहीले ३ जना सल्लाहकार नियुक्त गरेका छन् ।
शनिबारको प्रदेश मन्त्रिपरिषद बैठकले मुख्यमन्त्रीको राजनीतिक सल्लाहकारमा सल्यानका भिमप्रकाश शर्मा, जनसम्पर्क सल्लाहकारमा कालिकोटका जनकनाथ योगी र प्रशासनिक सल्लाहकारमा सुर्खेतका रत्न गाहालाई नियुक्त गर्ने निर्णय गरेको थियो ।
विवादितलाई मुख्यमन्त्रीले सल्लाहकार नियुक्त गरेको भन्दै सत्तारुढ नेकपा भित्रै विवाद सुरु भएको छ ।
मुख्यमन्त्रीको राजनीतिक सल्लाहकार नियुक्त भएका शर्मा २०७४ सालको प्रदेश सभा निर्वाचनमा तत्कालिन नेकपा एमालेका उम्मेदारविरुद्ध वागी उठेका थिए ।
एमाले नेता गुलावजंग शाहविरुद्ध बागी उम्मेदवारी दिएका शर्माले ७ हजार ४१६ मत प्राप्त गरेका थिए । यस्तै प्रशासनिक सल्लाहकार नियुक्त गाहा स्थानीय निर्वाचनमा नेकपाबाट वीरेन्द्रनगर नगरपालिकाको मेयरका उम्मेदवार थिए । उनले ५ हजार २२३ मत ल्याएका थिए ।
प्रदेश मन्त्रिपरिषद बैठकले प्रदेश लोकसेवा आयोगको गठन, काम, कर्तव्य र अधिकार सम्वन्धमा व्यवस्था गर्न वनेको विधेयक-२०७५ प्रदेशसभामा पेश गर्न स्वीकृति प्रदान गर्नुका साथै प्रादेशिक जडिबुटी तथा शीत भण्डार निर्माण कार्यलाई राष्ट्रिय प्राथमिकताको आयोजनामा समावेश गर्न र उक्त कार्यक्रम कार्यान्वयन गर्न भेरी गंगा नगरपालिका-१० स्थित जागृति सामुदायिक वन उपभोक्ता समूहको ६ हेक्टर वन क्षेत्र भोगाधिकार प्रदान गर्न दिने स्वीकृतिका लागि संघीय सरकारसंग अनुरोध गर्ने निर्णय गरेको छ ।
