News Portal

वैद्यको निर्देशनमा सुगतरत्नमाथि कालोमोसो, मन्त्री अधिकारी, र पूर्वमन्त्री पनि सूचीमा

१७३३ पटक

काठमाडौं । नेपाल वायु सेवा निगमका महाप्रबन्धक सगतरत्न कंसकारमाथि युवाहरुले कालोमोसो दलेका छन् । वाइडबडी विमान खरिद प्रकारणमा भ्रष्टाचार गरेको भन्दै सदनदेखि सडकसम्म विरोध भइरहेको बेला नेकपा (क्रान्तिकारी माओवादी)को युवा संगठन क्रान्तिकारी युवा लिगका युवाहरुले शुक्रबार कार्यकक्षमै पुगेर कालोमोसो दलेका हुन् । सार्वजनिक लेखा समिति अन्तरगत गठन भएको उपसमितिले वाइडबडी प्रकरणमा कंसाकारलाई मुख्य दोषी ठहर गर्दै कारवाहीको लागि सिफारिस गरेको थियो ।

लिगको ३ नं. प्रदेशका संयोजक संकल्पले घटना लगत्तै एक वक्तव्य जारी गरेर घटनाको जिम्मा लिएका छन् । उनले संगठनकै योजनामा निगमभित्र कंसकारकै कक्षमा कालोमसो दली कारबाही गरेको दाबी गरेका छन् । दिउँसो ४ बजेतिर कंसकारलाई कालोमोसो दलिएको हो ।
वाइडबडी खरिदमा प्रकरणमा ४ अर्ब ३५ करोड भ्रष्टाचारमा मुख्य भूमिका निभाएका भनिएका कंसकारलाई क्रान्तिकारी युवाहरुले कारवाही गरेको विज्ञप्तिमा उल्लेख छ ।

“पर्यटन मन्त्रालय तथा नेपाल वायु सेवा निगम समेतको संलग्नतामा खरिद गरिएको दुईवटा वाइडबडी जहाज (ए ३३०–२००) को खरिद प्रक्रियामा राज्य स्रोत, साधनको चरम दुरुपयोग गरी ४ अर्ब ३५ करोडभन्दा बढी अनियमितता भएको र त्यसमा निगमका महाप्रबन्धक कंसकारको मुख्य भूमिका देखिएकोले उनीमाथि कारबाही गरिएको हो” विज्ञप्तिको पहिलो बुँदामा भनिएको छ ।

त्यसैगरी संयोजक संकल्‍पले प्रकरणमा संलग्नलाई बर्खास्त गर्नुको साटो सरकारले भ्रष्ट मन्त्री र कर्मचारीलाई चोख्यान लागेको भन्दै विज्ञप्तिमा अापत्ति जनाएका छन् । उनले सो प्रकरणमा संलग्न सबैलाई बर्खास्त गर्न माग समेत गरेका छन् ।

पार्टीका महासचिव मोहन वैद्य ‘किरण’ को निर्देशनमा क्रान्तिकारी युवाहरुले वाइडबडी प्रकारणका भ्रष्टाचारीलाई कारवाहीको सुरु गरेको घटनामा संलग्न एक युवाले बताए । काण्डमा मुछिएका पर्यटनमन्त्री रविन्द्र अधिकारी, पूर्वमन्त्री जीवनबहादुर शाही र जितेन्द्र देवसहित उपसमितिले दोषी ठहर गरेका संचालक समितिका अध्यक्ष र सदस्यहरु कारवाहीको सूचीमा रहेको बताए । भ्रष्टाचारी, कालोबजारी, महंगी र विचौलियाविरुद्ध लिगले अभियान चलाइरहेको छ ।

कंसकारलाई कालोमोसो लगाएपछि जारी गरिएको विज्ञप्तिको पूर्णपाठः

क्रान्तिकारी युवा लिग, नेपाल ३ नंं. प्रदेशको योजनामा आज (२०७५÷०९÷२० गते) नेपाल वायु सेवा निगमका भ्रष्ट महाप्रबन्धक सुगतरत्न कंसकारमाथि उनकै कार्यकक्षमा दिउसो ४ बजे कालोमसो दली कारबाही गरिएको छ । यस कारबाहीबारे हाम्रो संगठनको धारणा सार्वजनिक गर्न हामीले यो वक्तव्य जारी गरेका छौं ।

१. पर्यटन मन्त्रालय तथा नेपाल वायु सेवा निगम समेतको संलग्नतामा खरिद गरिएको दुईवटा वाइडबडी जहाज (ए ३३०–२००) को खरिद प्रक्रियामा राज्य स्रोत, साधनको चरम दुरुपयोग गरी ४ अर्ब ३५ करोडभन्दा बढी अनियमितता भएको र त्यसमा निगमका महाप्रबन्धक कंसकारको मुख्य भूमिका देखिएकोले उनीमाथि कारबाही गरिएको हो ।

२. यतिबेला नेपालमा एकातिर साम्राज्यवादी–विस्तारवादी विदेशी शक्तिकेन्द्रको निर्देशन र समर्थन प्राप्त दलाल प्रतिक्रियावादी शक्ति राज्यसत्ता सञ्चालनको केन्द्रमा छ भने अर्को्तिर लाखौं लाख उत्पीडित सर्वहारा मजदुर किसान जनताको समर्थन र बलिदानको बीचबाट हाम्रो गौरवशाली पार्टी नेकपा (क्रान्तिकारी माओवादी)को नेतृत्वमा वर्तमान दलाल प्रतिक्रियावादी सत्ताको विरुद्धमा नयाँ जनवादी क्रान्तिको अभियानमा भीषण तयारी गर्दै अगाडि बढिरहेको छ ।

३. देशमा जनताले आजसम्म गरेको आन्दोलन, लडेको जनयुद्ध र त्यसको म्याण्डेट विपरीत हत्या, हिंसा, लुट, आतंक, बलात्कार जस्ता जघन्य सामाजिक अपराधका घटनाले स्वतन्त्रतापूर्वक बाँच्न पाउने आम जनताको न्याय प्रदत्त अधिकार विपरीत समाजको शान्ति सुरक्षाको स्थिति थिलथिलो भएको छ भने राष्ट्रघात, जनघात र संस्थागत भ्रष्टाचारले सीमा नाघेको छ । जसको पछिल्लो कडीको रुपमा वाइडबडी जहाज खरिद प्रकरणलाई जोड्न सकिन्छ ।

४. वाइडबडी जहाज खरिद प्रकरणमा जहाजको बोलपत्र मूल्यांकन तथा प्रस्ताव छनौंट, जहाज खरिद प्रक्रिया, खरिद बिक्री सम्झौता र भुक्तानी प्रक्रियामा ४ अर्ब ३५ करोडभन्दा बढी भ्रष्टाचार भएको सार्वजनिक लेखा समितिले गठन गरेको उपसमितिले मंगलबार मात्र प्रतिवेदन सार्वजनिक गरेको छ । जसमा वर्तमान पर्यटनमन्त्री रविन्द्र अधिकारी, पूर्वमन्त्रीद्वय जीवनबहादुर शाही र जितेन्द्र नारायण देवसहित पूर्व सचिव, वहालवाल सचिव र विभिन्न कर्मचारीको नाम सार्वजनिक गरेको छ । यसमा नेपाल वायु सेवा निगमका महानिर्देशक सुगतरत्न कंसकारको मुख्य भूमिका रहेको पनि तथ्यहरुले पुष्टि गरेको छ ।

५. यस पृष्ठभूमिमा भ्रष्ट मन्त्री र कर्मचारीहरुलाई जिम्मेवारीबाट बर्खास्त गरी आवश्यक कारबाही प्रक्रिया अगाडि बढाउनु पर्नेमा सरकारले यही १८ गते पूर्व प्रधानन्यायाधिश गोविन्द पराजुलीको संयोजकत्वमा छानविन समिति गठन गरेको छ । सरकारको यो कदम भ्रष्ट मन्त्री र कर्मचारीलाई चोख्याउन गरिएको बद्नियतपूर्ण कार्य हो ।

६. अन्तमा, हाम्रो संगठन देशभित्र र बाहिर छरिएर रहेका आम शोषित पीडित युवाहरुलाई क्रान्तिकारी युवा लिग, नेपालले भ्रष्टाचार, तस्कर, माफियाहरुका विरुद्ध थालेको यो अभियानमा लामबद्ध हुन हार्दिक आव्हान समेत गर्दछ ।”

संकल्प
संयोजक

प्रतिकृया दिनुहोस्