काठमाडौँ । प्रहरीले गोली प्रहार गरेर भारतीय नागरिकलाई पक्राउ गरेको छ । बुधबार दिउँसो काठमाडौँको गोठाटारमा प्रहरीले भारतको पश्चिम बंगाल घर भएका मोहम्मद करिमलाई गोली हानेर नियन्त्रणमा लिएको हो ।

उपत्यका अपराध अनुसन्धान कार्यालयका अनुसार मोहम्मद करिमको साथबाट प्रहरीले एकथान पेस्तोल बरामद गरेको छ । करिम लागु औषध कारोबारी भएको समेत बताएको छ ।

प्रहरीले चलाएको एक राउण्ड गोली करिमको खुट्टामा लागेको बताएको छ । उनको साथबाट २ सय ग्राम खैरो हेरोइन जस्तो पदार्थ र तराजु फेला परेको प्रहरीले बताएको छ ।