अनलाइन डबली
धनगढी । नेकपा (माओवादी केन्द्र) अछाम जिल्लाको तेस्रो पूर्ण बैठक सम्पन्न भएको छ । बैठकले ‘जनतासँग माओवादी विशेष रुपान्तरण’ अभियानलाई वडा -टोलसम्म पुर्याउने निर्णय पनि गरेको छ । सोही अनुसारको कार्यक्षेत्र पनि विभाजन गरेको संयोजक रविन्द्र साउदले जानकारी दिनु भएको छ ।
अभियानमा जिल्लाभरी ६०९ जना नेता कार्यकर्ता खट्ने भएका छन् । केन्द्रीय सदस्यहरुले नेतृत्व गर्ने अभियान टोलीमा प्रदेश सदस्यहरु, जिल्ला सदस्यहरु, पालिका र वडा कमिटीलाई पनि खटाइने भएको छ ।
अभियान यही १६ गतेबाट जिल्लाभरी एकसाथ सुरु गर्नेगरी कार्यक्षेत्र विभाजन गरिएको संयोजक साउदले जानकारी दिनुभयो ।
बैठकमा जिल्ला इन्चार्ज ओपप्रकाश पुनले अछाम जिल्ला जनयुद्धमा आधार क्षेत्र भएको बताउँदै फेरि अग्रभागमा रहेर अभियानलाई जनताको घरघरसम्म पुर्याउनु पर्ने बताउनुभयो ।
पार्टीकाे केन्द्रीय सदस्य समेत रहेका पुनले अभियानले अहिलेसम्म जनतासँग कटेको कडीलाई जोड्नुको साथै नेता कार्यकर्तालाई रुपान्तरण गर्ने विश्वास व्यक्त गरे ।
