अनलाइन डबली
नेपालगंज । मुगु जिप दुर्घटनामा घाईते भएकाहरुलाई थप उपचार गर्न नेपाली सेनाको हेलिकप्टर मार्फत नेपालगंज लगिएको छ ।
सोमबार अपरान्ह ४ बजे भएको जिप दुर्घटनामा परी घाईते भएका चार जनाको जिल्ला अस्पताल मुगुमा प्रारम्भिक उपचार भएपनि अस्पतालमा सिटि स्क्यानलगायतका मेसीन नहुदाँ घाईतेहरुलाई सुविधा सम्पन्न अस्पतालमा उपचार गर्न नेपाली सेनाको हेलिकप्टर मार्फत नेपालगंज लगिएको हो ।
वर्षाको पानीले कर्णाली राजमार्ग अन्तरगत गोठीजिउला – गमगढी सडक खण्डको ठाँउ ठाँउमा पहिरो गएको र रारा विमान स्थलमा नेपाल नागरिक उड्डयान प्राधिकरणको निर्णयले हवाई सेवा दिउसो सञ्चालनमा नरहेकाले घाईतेहरुको हेलिकप्टर मार्फत थप उपचार गर्न हेलिकप्टरको व्यवस्था मिलाईएको मुगु जिल्लाबाट संघिय सांसद ऐन बहादुर शाहीले जानकारी दिए ।
घाईतेहरुको टाउकोमा चोट देखिएकाले सिटिस्क्यान मेसीन नहुदाँ उनिहरुको टाउको चोट कत्तिको छ भन्ने थाहा नभएको जिल्ला अस्पातल मुगुका डाक्टर नहकुल शाहीले बताए । उनका अनुसार टाउको सर्पोटका लागि आवश्यक सरभाईकल कोलर र स्पाईलल ब्याक सर्पोट नहुदाँ कार्टुनको प्रयोग गरेर भएपनि उपचार गरिएको थियो ।
सोमबार भएको जिप दुर्घटनामा सवार ९ जना मध्य हुम्ला जिल्ला सर्केगाड–२ रिपगाउँका एकै नाम थरका दुई जना राम परियार, सोही ठेगानाका प्रकाश बोहोरा र पिउस परियारको मृत्यु भएको थियो भने मुगुको सोरु गाउँपालिका वडा नम्बर–५ का वडा सदस्य लोकजंग नेपालीको उपचार गर्न जिल्ला अस्पताल ल्याउदै गर्दा बाटो मै मृत्यु भएको थियो ।
दुर्घटनामा मुगुको सोरुगाउँपालिका ७ चिप्लेगौडा नजिकै दुर्घटना भएको थियो । दुर्घटनामा परेका ४ जना चालक दिनेश लावड, सोरु–५ का गोविन्दा शाही,सोरु ६ कै सेरे रोकाया र हुम्ला सिमीकोट–२ का उजिर बोहोरा गम्भीर घाइते भएका थिए । घाईते ४ जनाको २४ घण्टा पछि सुविधा सम्पन्न अस्पातलमा लगिएको छ ।
सोरु गाउँपालिकाबाट जिल्ला सदरमुकाम गमगढीका लागि छुटेको ग १ ज ७७६२ नम्बरको जीप सोरु गाउँपालिका ७ चिप्लेगाडामा सोमबार अपरान्न ४ बजे दुर्घटना भएको थियो ।
