काठमाडौँ  । सहकारी संस्था बचत रकम दुरुपयोग सम्बन्धमा गठित संसदीय छानबिन विशेष समितिले सहकारीको रकम हिनामिना र अपचलनमा संलग्न भएर विदेश फरार भएका १८ जनालाई स्वदेश फर्काउन गृहमन्त्रीलाई निर्देशन दिएको छ ।

समितिको आज सोमबार बसेको बैठकले गृहमन्त्री रमेश लेखक तथा गृहसचिव एकनारायण अर्यालसँग छलफल गरि बिदेशमा फरार भएका १८ जनालाई स्वदेश फर्काउने व्यवस्था गर्न निर्देशन दिएको हो ।

समिति सभापति सूर्यबहादुर थापा क्षेत्रीले बैठकपछि सञ्चारकर्मीलाई जानकारी दिँदै सहकारीको रकम अपचलनमा मुछिएका देशबाहिर रहेका १८ जनालाई खोज्न, स्वदेश फर्काउन र छानबिन प्रक्रियामा सघाउन गृहमन्त्रीलाई निर्देशन दिएको जानकारी दिनुभयाे ।

सानोपाइला, सहारा, सूर्यदर्शन, स्वर्णलक्ष्मी, हाम्रो नयाँ कृषि, सुप्रिम , समानता , सुमेरु र कालीमाटी सहकारीका भरत महर्जन, राजमाया महर्जन, सचिन महर्जन र सरला महर्जन ,  जीबी राईलाई स्वदेश फर्काउन निर्देशन दिएको छ ।

यसैगरी सूर्यदर्शन सहकारीका अध्यक्ष भइसकेका ज्ञानबहादुर बम्जन र थानबहादुर बुढा मगर, शिवशिखर सहकारीका भूपेन्द्र राई, तेजबहादुर बम्जन तामाङ र लीलानाथ गौतम, इमेज सहकारीका देवकुमार नेपाली, छेदा नेपाली र दीपक पौडेल, सानो पाइलाका तस्विरण खातुन र असरफ अली, सहारा सहकारी र सुप्रिमका सुवास केसी, कान्तिपुर सहकारीका प्रेमध्वज लामा र मेगाड्रिम सहकारीका महाशंकर रेग्मीलाई नेपाल फर्काउन पनि समितिले निर्देशन दिएको छ ।

समितिले कारागार र थुनामा रहेका २४ जना सोधखोज गर्नुपर्ने देखिएको भन्दै सोधपुछ गर्नुपर्नेहरूको नाम पनि गृहमन्त्रीलाई बुझाएको छ ।