अनलाइन डबली
काठमाडौं । (नेकपा) एकिकृत समाजवादी पार्टीका अध्यक्ष माधव कुमार नेपालले राष्ट्रिय राजनीतिमा विद्रोहको ज्वाला दन्काएको दाबी गरेका छन् । मंगलबार राष्ट्रिय जनसांस्कृतिक महासंघ समाजवादीले आयोजना गरेको सांस्कृतिक साँझ कार्यक्रमलाई सम्बोधन गर्दै अध्यक्ष नेपालले कम्युनिष्ट आन्दोलनमा एक्लै भएपनि अगाडि बढ्ने आँट गरेको बताएका हुन् ।
उनले भने, ‘नेपालको कम्युनिष्ट आन्दोलनमा हामीले जुन पहल गरेका छौं । विद्रोह गर्ने आँट गरेका छौं । विद्रोहको ज्वाला दन्काएका छौं । एक्लै भएपनि अगाडी बढ्ने प्रयास गरेका छौं । हाम्रो साथमा देशभरिका नेता र कार्यकर्ताहरु जुट्दै जुट्दै ७७ वटै जिल्लामा संगठन विस्तार गर्दै अगाडी बढेका छौं । राष्ट्रिय राजनीतिमा हाम्रो पार्टीले खेलेको भूमिकाप्रति हामीले गर्व गर्नुपर्छ । राष्ट्रिय राजनीतिमा हामीले खेलेको भूमिकाप्रति गौरव गर्नुपर्छ । राष्ट्रिय राजनीतिका सबै शक्तिहरूलाई हामीले राम्रोसँग चिनेको छौँ । हामीले समाजवादी क्रान्तिको कार्यक्रमलाई अगाडि सारेको छ । अरू पार्टीले यस्तो कार्यक्रम ल्याएका छैनन् ।’
पार्टीका भातृ संगठनहरुलाई व्यवस्थित गरेर अगाडि सार्ने एकमात्र पार्टी नेकपा एस रहेको अध्यक्ष नेपालको भनाइ थियो । उनले समाजवादी मोर्चालाई नयाँ शिराबाट अगाडी बढाउन समेत छलफल भइरहेको बताए ।
‘विभिन्न कम्युनिष्ट पार्टीहरूसँग हाम्रो संवाद भइरहेको छ । समाजवादी मोर्चा बनाउँदै अघि बढेका छौँ । आजै पनि विभिन्न समूहसँग कुरा भएको छ । नयाँ शिराबाट त्यसलाई अगाडि बढाउनुपर्छ । देशभरिको समाजवादी शक्तिहरूलाई गोलबन्द गर्नुपर्छ’, उनको भनाइ छ ।
