अनलाइन डबली
काठमाडौं । आईसीसी टी-२० विश्वकप २०२४ अन्तर्गत नेपालको खेल हेर्न देश विदेशमा रहेका नेपालीहरु सडकमा निस्किएका थिए । नेपालले जित्ने अपेक्षासहित खेल हेरिरहरेका नेपाली निरास भएर घर फर्किन बाध्य भएका छन् ।
गएराति नेदरल्याण्ड्ससँगको पहिलो खेलमा नेपाल ६ विकेटले पराजित भएको छ । नेपालले कमजोर चुनौतीलाई नेदरल्याण्ड्सले १८.४ ओभरमा ४ विकेट गुमाएर पूरा गरेको थियो । नेपालले १०७ रनको चुनौती दिएको थियो ।
खेलमा नेदरल्याण्ड्सका लागि ओपनर म्याक्स ओ’डाउडले अविजित रहँदै सर्वाधिक ५४ रन बनाएर उत्कृष्ट खेल खेले । उनले ४८ बल खेलेका उनले ४ चौका र १ छक्का प्रहार गरे । यस्तै विक्रमजित सिंहले २२ र साएब्रान्ड एंगलब्रेक्टले १४ रन जोडे । बास डे लिडले अविजित ११ रन बनाए ।
डालासस्थित ग्राण्ड प्रेरी स्टेडियममा टस हारेर पहिले ब्याटिङ गरेको नेपालले १९.२ ओभरमा सबै विकेट गुमाएर १०७ रनमै समित भयो । नेपालका लागि सोमपाल कामी, दिपेन्द्र सिंह ऐरी र अभिनाश बोहराले एकएक विकेट लिए ।
चार खेलाडीले मात्र दोहोरो अंकमा रन बनाएको नेपालको लागि कप्तान रोहित पौडेलले ३७ बलमा सर्वाधिक ३५ रन बनाए । उनले ५ चौका प्रहार गरे । रोहितले एक छेउबाट इनिङ्स सम्हाल्ने प्रयास गरेपनि गतिलो साथ पाउन सकेनन् ।
लोअर अर्डरमा करण केसीले १२ बल खेल्दै २ छक्का मदतमा १७ रन जोडे । गुल्सन झाले १५ बलमा १ छक्का प्रहार गर्दै १४ तथा अनिल शाहले १२ बलमा २ चौका मदतमा ११ रन जोडे ।
नेपालका लागि दोस्रो पटक टी २० विश्वकप खेल्ने एक मात्र खेलाडी सोमपाल कामी शून्यमा आउट भए । अन्तिम विकेटका रुपमा आउट भएका अभिनाश बोहराले पनि खाता खोल्न सकेनन् ।
नेपाललाई अलआउट गर्न बलिङमा नेदरल्याण्ड्सका लागि टिम प्रिन्जल र लोगन भान विकले समान ३ तथा पउल भान मिकेरन र बास डे लिडले समान २ विकेट लिए ।
एक दशकपछि दोस्रो पटक टी २० विश्वकप खेलिरहेको नेपालले पहिलो खेलमा राम्रो सुरुवात गर्न सकेन । बलियो टोली नेदरल्याण्ड्स विरुद्धको नेपालको ब्याटिङ गर्न चुकेको नेपालले अन्ततः पहिलो खेलमै पराजय भोग्न पुगेको छ ।
