अनलाइन डबली
हेटौडा । मकवानपुरको ऋषेश्वर सामुदायीक वनमा डढेलो लागेको छ । बकैया गाउँपालिका– २ स्थित उक्त सामुदायीक वनका पदाधिकारी र काठ तस्करको मिलेमतोमा आगो लगाइएको स्थानीयको आरोप छ ।
केही दिन पहिले अनलाइन डबलीले उक्त सामुदायीक वनमा फडानी गरी काठ ओसारपसारको तयारी भइरहेको समाचार सार्वजनिक गरेको थियो । उक्त समाचार सार्वजनिक भएसँगै समितिका पदाधिकारी र तस्करहरुले फडानीको प्रमाण नष्ट गर्न वनमा आगो लगाएको एक स्थानीयले अनलाइन डबलीसँग भने ।
“वनमा आगो लगाइएको छ । समितिका पदाधिकारी र तस्करकै योजनामा आगो लगाइएको देखिन्छ । ढालेको हरियो रुख, काठको ठुटो तथा जरा जलाएर प्रमाण नष्ट गर्न आगो लगाएको देखिन्छ” एक स्थानीयले भने । उनले हरियो रुख ढालेको अहिले जलेर सुकोजस्तो देखिएको बताए ।
यही विषयमा हामीले सामुदायीक वन समितिका अध्यक्ष नरबहादुर बास्कोटासँग सम्पर्क गरेका थियौँ । उनले वनमा आगो लागेको तर आफूहरुले लगाएको भन्ने आरोप निराधार भएको बताए ।
“यो आरोप निराधार हो, डढेलो देशभरीको समस्या हो । हाम्रो वनमा बाहिर जिल्लाको सीमाबाट आएको आगोले बन जलेको हो । हामीलाई बचाउन चाहेर पनि सकेनौं” बास्कोटाले भने ।
बास्कोटाले दुईतिरको आगो बाहिर जिल्लाबाट आगो आएको तर त्यो भन्दा दुई स्थानमा भित्रैबाट आगो लागेको बताउँदै आफूहरुलाई पनि कसले लगायो भन्ने शंका लागेको बताए । “आगो बाहिरबाट आएको हो । तर, दुई स्थानमा लगाएको आगोले गोलाई (काटेको काठ) जलेको छ । हामीलाई यसमा शंका लागेको छ । हाम्रो विरोध गरेर हिड्ने समूहले आगो लगाएको हुन पनि सक्छ” बास्कोटाले भने । उनले आफूलाई काटेको काठ जोगाउन समेत गारो भएको समेत बताए ।
यसअघि स्थानीयले उक्त सामुदायीक वनका पदाधिकारीहरुले अख्तियारीको दुरुपयोग गर्दै वन अबैध वन फडानी गरेको भन्दै अख्तियार दुरुपयोग अनुसन्धान आयोगमा उजुरी पनि परेको छ ।
समितिका पदाधिकारी र वनका कर्मचारीसँग सेटिङ गरेर वन फडानी र अनियमितता गरेको भन्दै अख्तियारमा उजुरी परेको थियो ।
उजुरीमा २०६६ सालदेखि हालसम्म वनका कर्मचारीसँगको मिलेमतोमा समितिका पदाधिकारीहरुले आफ्नो स्वार्थ पूरा गर्न अवैधरुपमा वन फडानी गरिरहेको उल्लेख छ ।
उजुरीमा मानबहादुर मोक्तान (२०६६ सालको उपभोक्ता वन समिति अध्यक्ष, आइतमान जिम्बा (२०७७/०७८ सालका अध्यक्ष), नरबहादुर बास्कोटा (हालका अध्यक्ष), दुर्गाबहादुर स्याङ्तान (सचिव), कुन्साङ मोक्तान (श्रीमति समिति सदस्य) र तोकबहादुर स्याङ्तान (ठेकेदार) र जनप्रतिनिधि (वडा सदस्य) गणेश लामामाथि छानविन गरी कारवाहीको माग गरिएको छ ।
