अनलाइन डबली
काठमाडौँ । उपचुनाव अन्तरगत इलाम र बझाङमा मत गणनाको ताजा परिणाम आइरहेको छ । इलाम–२ को नेपाली काँग्रेसका उम्मेदवार गम्बर बहादुर खड्काले सुरुदेखि नै अग्रता लिएका छन् । पछिल्लो परिणाम अनुसार १७२२ मत प्राप्त गरेका छन् ।
त्यसैगरी नेकपा एमालेका उम्मेदवार सुहाङ नेम्वाङले १३७० मत पाएको मत गणनास्थलमा रहेका काँग्रेसका एक नेताले जानकारी दिए ।
नयाँ शक्ति भन्दै निकै प्रचार गरेका रास्वपाका उम्मेदवार मिलन लिम्बू चौथो नम्बरमा रहेका छन् । त्यो भन्दा अगाडि हर्क साम्पाङले समर्थन गरेका स्वतन्त्र उम्मेदवार डकेन्द्र सिंह लिम्बुले ३९० मत प्राप्त गरेका छन् । मिलनले २९५ मत पाएका छन् ।
यो परिणाम प्रारम्भिक भएकोले अहिले नै कसले जित्छ भन्न नसकिने बताइएको छ ।
उता बझाङमा भने एमालेका उम्मेदवार दमनबहादुर भण्डारीले १३५० मत पाएका छन् । काँग्रेस उम्मेदवार अभिषेकबहादुर सिंह ७३० मत पाएका छन् ।
त्यसैगरी नेकपा (माओवादी केन्द्र)का उम्मेदवार जनकबहादुर बुढाले ४९० मत पाएका छन् भने नेकपा एकीकृत समाजवादीका दिलबहादुर सिंहले ३९५ मत पाएका छन् ।
