अनलाइन डबली
काठमाडौं । लुम्बिनी र गण्डकी प्रदेशमा नयाँ सरकार बनेको छ । लुम्बिनी प्रदेशका मुख्यमन्त्री जोखबहादुर महराले शपथ लिएका छन् । शुक्रबार मुख्यमन्त्री भएका महराले आइतबार प्रदेश प्रमुख अमिक शेरचनसँग पद तथा गोपनीयताको शपथ ग्रहण गरेका हुन् ।
मुख्यमन्त्री महराले आजै मन्त्रिमण्डल बिस्तार गरेका पनि छन् । विस्तारित मन्त्रिमण्डलमा माओवादी केन्द्रबाट दीपेन्द्र पुन, नेकपा एमालेबाट चेतनारायण आचार्य र जसपाबाट भण्डारीलाल अहिरलेलाई विना विभागीय मन्त्री बनेका छन् ।
नवनियुक्त मन्त्रीहरूलाई पनि आइतबारै प्रदेश प्रमुख अमिक शेरचनले शपथ ग्रहण गराएका छन् ।
त्यसैगरी गण्डकी प्रदेशका नवनियुक्त मुख्यमन्त्री खगराज अधिकारीले पनि आज शपथ लिएका छन् । बहुमत सांसद जुटाएर दाबी पेश गरेका अधिकारीलाई प्रदेश प्रमुख डिल्लीराज भट्टले आइतबार पद तथा गोपनियताको शपथ गराएका हुन् ।
मुख्यमन्त्रीसँगै माओवादीका हरिबहादुर चुमान र स्वतन्त्र सांसद दिपक मनाङेले पनि मन्त्रीको शपथ लिएका छन् ।
यसअघि आइतबार बिहान मात्रै गण्डकी प्रदेश, एमाले संसदीय दलका नेता खगराज अधिकारीले मुख्यमन्त्रीमा दाबी पेश गरेका थिए । अधिकारीले नेकपा माओवादी केन्द्रबाट सभामुख बनेका कृष्ण धिताल समेतको समर्थन लिएका थिए ।
कोशी प्रदेशमा नयाँ सरकारको लागि गठबन्धन दलका नेताहरु छलफलमा जुटेका छन् । मुख्यमन्त्री केदार कार्कीले राजिनामा नदिएपछि एमालेले समर्थन फिर्ता लिएर बहुमत जुटाएर दाबी पेश गर्ने तयारी भइरहेको छ ।
