अनलाइन डबली
काठमाडौँ । लुम्बिनी प्रदेशमा मुख्यमन्त्रीको लागि नेकपा माओवादी केन्द्रका संसदीय दलका नेता जोखबहादुर महराले दाबी पेश गरेका छन् । प्रदेशसभाका बहुमत सदस्यको हस्ताक्षरसहित शुक्रबार प्रदेश प्रमुखसमक्ष दाबी पेश गरेका छन् ।
विहीबार चार पार्टी र एक स्वतन्त्र सांसदले महरालाई नयाँ मुख्यमन्त्रीको लागि समर्थन गर्ने सहमति गरेका थिए ।
सोही अनुसार माओवादी केन्द्र, नेकपा एमाले, नेकपा एकीकृत समाजवादी, जसपा र स्वतन्त्र २ जनासहित ४४ जना सांसदको समर्थन पेश गरेका छन् ।
विश्वासको मत जुटाउन नसकेपछि विहीबार मुख्यमन्त्री डिल्ली चौधरीले राजीनामा दिएका थिए । प्रदेश प्रमुख शेरचनले आज शुक्रबार मात्र तीन दिनको समय दिएर संविधानको धारा १६८ (२) अनुसार प्रदेश सभामा प्रतिनिधित्व गर्ने दुई वा दुईभन्दा बढी दलको समर्थनमा नयाँ सरकार बनाउन आह्वान गरेका थिए ।
८७ सदस्यीय लुम्बिनी प्रदेश सभामा बहुमतका लागि ४४ सांसदको समर्थन चाहिन्छ ।
