![](https://onlinedabali.com/wp-content/uploads/2023/03/Kamal.jpeg)
काठमाडौं । सुदूरपश्चिमका मुख्यमन्त्री कमलबहादुर शाहले बिहीबार विश्वासको मत लिने घोषणा गरेका छन् । मंगलबार मुख्यमन्त्री शाहले विश्वासको मत लिने प्रस्ताव प्रदेशसभा सचिवालयमा दर्ता गराएका छन् ।
प्रदेशसभा सचिवालयले बिहीबार ३ बजे बस्ने बैठकमा मुख्यमन्त्रीले विश्वासको मत लिने सूचना निकालेको छ ।
केन्द्रमा नयाँ समिकरण बनेलगत्तै मुख्यमन्त्री शाहले २२ फागुनमा नेकपा माओवादी केन्द्रका मन्त्रीहरुलाई बर्खास्त गरेका थिए । शाहले बर्खास्त गरेसँगै माओवादी केन्द्रले विश्वासको मत फिर्ता लिएको थियो ।
नागरिक उन्मुक्ति, राप्रपा र स्वतन्त्र सांसदलाई जुटाएर सरकारलाई निरन्तरता लिने विश्वासका साथ मुख्यमन्त्री शाहले हतारमा माओवादी मन्त्रीलाई बर्खास्त गरेका थिए । तर, परिस्थिति उनले सोेचेजस्त बन्न सकेन ।
नागरिक उन्मुक्तिका सातमध्ये पाँच सांसदलाई मन्त्री समेत बनाएका मुख्यमन्त्री शाहले राप्रपा र स्वतन्त्र सांसदलाई पनि मन्त्रीको अफर गरिरहेका छन् ।
नाउपाभित्रको लफडाले मुख्यमन्त्री शाहले विश्वासको मत पाउने सम्भावना न्यून बन्दै गइरहेको छ ।