अनलाइन डबली
काठमाडौँ । नेपाल समाजवादी पार्टीका अध्यक्ष डा बाबुराम भट्टराई राजनीतिमा फेरि एकपटक एक्लिएका छन् । नेसपाका अध्यक्ष महिन्द्रराय यादव पक्षको नेतृत्वमा माओवादी केन्द्रसँग एकता गर्ने सहमति भएपछि बाबुराम एक्लिएका हुन् ।
कम्युनिस्ट विचार काम नलाग्ने भन्दै माओवादी केन्द्रबाट छुटिएर नयाँ शक्ति निर्माणमा जुटेका बाबुराम भट्टराई पटकपटक एक्लिँदै आएका छन् । माओवादीका केही युवा नेताहरु लिएर नयाँ शक्ति गठन गरेका बाबुराम अब भने राजनीतिक हिसाबमा थला पर्ने नेसपाका नेताहरु नै बताउँछन् ।
चुनावअघि पार्टी एकता गर्ने भन्दै माओवादी केन्द्रको चिन्हमा चुनाव लड्न तयार भएका बाबुराम अहिले भने विभिन्न बहानाबाजी बनाउन थालेपछि यादवको नेतृत्वमा एकता हुन लागेको हो । दुई पार्टीका महासचिवले संयुक्त रुपमा विज्ञप्ति जारी गर्दै पार्टी एकता प्रक्रिया अगाडि बढेको बताएका छन् ।
सहमतिमा माओवादी केन्द्रका महासचिव देवप्रसाद गुरुङ र नेसपाका महासचिव रमेश यादवले हस्ताक्षार गरेका छन् । यो सहमतिसँगै बाबुराम एकतामा छुटेका हुन् । भट्टराईले आज आफू पक्षिय नेताहरुको बैठक बोलाएका छन् ।
गत मङ्सिर ६ गते नै केन्द्रीय समिति बैठकले माओवादीसँग एकताकोक लागि संयोजन समिति बनाएको थियो ।
सहअध्यक्ष गंगानारायण श्रेष्ठले सिंगो पार्टी माओवादीसँग एकता गर्न लागेको बताए । उनले चुनावअघिको सहमतिअनुसार नै पार्टी एकता हुने बताए ।
पार्टी विभाजनसँगै बाबुरामसँग गएका ९९ प्रतिशत पुराना नेता कार्यकर्ता यो एकतासँगै माओवादीमै फर्किन लागेको बताइएको छ ।
