अनलाइन डबली
काठमाडौँ । राजनीतिक समिकरणसँगै नेकपा एमाले समाजवादी मोर्चामा पनि सहभागी हुने भएको छ । नेकपा (माओवादी केन्द्र)को अगुवाईमा गठन भएको समाजवादी मोर्चामा अब एमाले पनि सहभागी हुने भएको छ ।
नयाँ समिकरणको लागि पहल गरेको माओवादी केन्द्र र एमाले दोस्रो तहका नेताहरुबीच एमाले पनि मोर्चामा सहभागी हुने सहमति भएको थियो । दुबै तिरको नेताहरुले प्रचण्ड र ओलीसँगको परामर्शमा यो सहमति भएको बताइएको छ ।
“नयाँ राजनीतिक सहकार्यसँगै एमाले मोर्चामा आउँछ, फेरि कम्युनिस्ट एकताको बहस तलसम्म चल्छ” स्रोतले भन्यो ।
स्रोतका अनुसार मोर्चाका संयोजक अब ओली बन्नेछन् । प्रचण्ड प्रधानमन्त्री भएकोले मोर्चाका नेतृत्व ओलीले गर्ने बताइएको छ ।
यो सहमतिसँगै नेकपा एकीकृत समाजवादी भने चिढिएको छ । एमाले एकीकृत समाजवादीसँग पनि सहकार्य गरेर जान तयार देखिएको छ । मोर्चामा एकीकृत समाजवादी भएपनि आफूलाई कुनै समस्या नहुने एमाले नेताहरुले छलफलको क्रममा बताएका थिए ।
