अनलाइन डबली
काठमाडौँ । नेपाली काँग्रेसका कारण सत्ता गठबन्धन भत्किएको छ । आजै सानो आकारका नयाँ मन्त्रिमण्डल बन्ने भएको छ । काँग्रेसले कोशीमा दिएको धोका, महासमिति बैठकका निर्णयलगायत विषयले नेकपा माओवादी केन्द्रलाई जिस्काउँदै लगेको थियो ।
महामन्त्री गगन थापाको गनगनले गठबन्धन भत्किाउन सहयोग गरेको काँग्रेस नेताहरु नै बताउँछन् । हिजो रातिसम्म बालुवाटारमा प्रधानमन्त्री तथा माओवादी केन्द्रका अध्यक्ष प्रचण्डले एमालेसहितका नेताहरुसँग गरेको छलफलपछि नयाँ समिकरणलाई अन्तिम रुप दिएको हो ।
विहानै प्रचण्डले गठबन्धन बाहिरका ओली र रवि लामिछानेलाई पनि बालुवाटारमा बोलाएका थिए । त्यतिबेला पनि सामान्य छलफल भएको थियो । तर, अन्तिम रुप भने साँझ अबेरमात्रै दिइएको स्रोतले बताएको छ ।
छोटो समय गृहमन्त्री बनेका रवि लामिछानेले छलफलको सुरुमै आफ्नो दल पनि नयाँ सरकारमा सहभागी हुने बताएका थिए । उनले छलफलकै क्रममा आफूलाई नयाँ सरकारमा नछुटाउन पटकपटक भनेका छलफलमा सहभागी एक नेताले भने । “रविजीले प्रधानमन्त्रीसँग पटकपटक नयाँ सरकारमा आफूलाई नछुटाउन अनुरोध गर्नुभएको थियो” स्रोतले भन्यो ।
“प्रधानमन्त्रीज्यू, नयाँ समिकरणमा मलाई नछुटाउनुहोला, तपाईँको सुशासन र भ्रष्टाचारविरुद्धको अभियानमा सहयोग गरेर जाने मन छ । नयाँ बन्ने सरकारमा मलाई पनि नछुटाउनुहोला” रविको भनाई उदृत गर्दै स्रोतले भन्यो ।
