अनलाइन डबली
काठमाडौं । कानुन, न्याय तथा संसदीय मामिलामन्त्री धनराज गुरुङले संक्रमणकालीन न्यायसम्बन्धी विधेयकमा सहमति जुटाउन थप समय मागेका छन् ।
आइतबार बसेको प्रतिनिधिसभाको कानुन, न्याय तथा मानवअधिकार समितिको बैठकमा केही विषयमा सहमति नजुटेपछि गुरुङले सोमबार विहानसम्मको समय मागेका हुन् ।
आजको बैठकमा मानव अधिकार उल्लंघनको घटनामा मेलमिलापका लागि पीडितको स्वतन्त्र सहमति नभए के गर्ने भन्ने विषय र घटी सजायबारे सहमति हुन सकेन । मानवअधिकारको गम्भीर उल्लंघनमा नियतवश स्वेच्छाचारी रुपमा गरिएको व्यक्तिहत्या (आर्बिटरी किलिङ) राख्न दलहरु सहमत देखिएका छन् ।
मानवअधिकार उल्लंघनको घटनामा मेलमिलापका लागि पीडितको स्वतन्त्र सहमति चाहिने व्यवस्था गर्न दलहरु सहमत छन् । तर स्वतन्त्र सहमति नभएमा के गर्ने भन्ने टुंगिएको छैन ।
टीआरसीमा सहमति जुटाउने प्रयासमा प्रधानमन्त्री प्रचण्ड लागेका छन् । आइतबार विहान नेपाली काँग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली र रवि लामिछानेसँग छुटाछुटै छलफल गरेका थिए ।
