काठमाडौं । सत्तारुढ दलको बैठक प्रधानमन्त्री निवास बालुवाटारमा बसिरहेको छ । बैठकमा नेकपा माओवादी केन्द्रसहित नेपाली कांग्रेस, जसपा, एकीकृत समाजवादी, लोसपा, नाउपा लगायत दलका नेताहरु सहभागी छन् ।
बैठकमा मुख्यमन्त्री पनि सहभागी भएको बताइएको छ ।

आजको बैठकको मुख्य एजेण्ड राष्ट्रियसभा अध्यक्ष, संघीयता कार्यान्वयनबारे मुख्यमन्त्रीहरुले उठाउँदै आएका कुरालगायत संसदलाई विजनेश दिनेबारे छलफल भइरहेको स्रोतको दाबी छ ।

फागुन २२ गते राष्ट्रिय सभाका अध्यक्ष गणेशप्रसाद तिमिल्सिनाको कार्यकाल सकिँदैछ । राष्ट्रियसभा निर्वाचन सकिएसँगै दलहरु अध्यक्षको उम्मेदवारबारे दलहरु अनौपचारिक छलफलमा जुटेका थिए ।

राष्ट्रियसभामा पहिलो दल बनेको नेकपा माओवादी केन्द्रले अध्यक्ष दाबी गरेको छ । माओवादी केन्द्रका उपमहासचिव वर्षमान पुनले बुधबार एक सार्वजनिक कार्यक्रममा अध्यक्षमा आफ्नो पार्टीको दाबी रहेको बताएका थिए ।

त्यसैगरी नेपाली काँग्रेसले नेता कृष्णप्रसाद सिटौलालाई अगाडि सार्ने तयारी गरेको छ । गठबन्धनमा कसलाई अध्यक्षको उम्मेदवार बनाउनेभन्नेमा सहमति जुटेको छैन ।