अनलाइन डबली
काठमाडौँ । नेपाल राष्ट्र बैंकले आज बजारबाट ४५ अर्ब रुपैयाँ खिच्न लागेको छ । बजारमा अधिक तरलता भएपछि केन्द्रीय बैंकले १४ दिन अवधिका लागि सार्वजनिक बोलकबोल मार्फत ४५ अर्ब रकम खिच्न लागेको हो ।
राष्ट्र बैंकले एक सूचना जारी गर्दै दरखास्त आह्वान गरेको छ । सूचनामा इच्छुक क, ख र ग वर्गका बैंक तथा वित्तीय संस्थाले आज दिउँसो ३ बजेसम्म आवेदन दिन सक्ने जारी सूचनामा उल्लेख छ ।
इच्छुक आवेदकले प्रस्तावित ब्याजदरसहित घटीमा १० करोड र बढीमा ५ करोड रुपैयाँले भाग गर्दा निःशेष भाग जाने गरी आवेदन दिन सक्नेछन् । उक्त निक्षेप संकलनका लागि न्यूनतम ब्याजदर बोलकबोल प्रक्रिया मार्फत तय हुनेछ । बहुब्याजदरमा बहुबोलकबोल पनि गर्न सकिने राष्ट्र बैंकले जनाएको छ ।
उक्त निक्षेप २०८० फागुन ९ गते परिपक्व हुनेछ ।
यस अघि राष्ट्र बैंकले हिजो माघ २३ गते ४० अर्ब संकलन गरेको थियो । राष्ट्र बैंकका अनुसार माघ २३ को बोलकबोल प्रक्रियामा १६ वटा बैंक तथा वित्तीय संस्था सहभागी भएका थिए । यी संस्थाले कुल ७३ वटा आवेदन पेश गरेका थिए । राष्ट्र बैंकले ४० अर्ब खिच्नको लागि आवेदन माग गरेकोमा बैंकहरुले ४६ अर्ब १५ करोडसम्म रकम अफर गरेका थिए ।
गत मङ्सिर, पुस र माघमा गरि राष्ट्र बैंकले बजारबाट ५ खर्ब बढी रकम निक्षेप संकलन प्रक्रियाबाट खिचिसकेको छ ।
