अनलाइन डबली
काठमाडौँ । नेकपा (माओवादी केन्द्र)ले भूकम्प पीडितको लागि अस्थायी आवास बनाउन तीन हजार स्वयंसेवक परिचालन गरेको छ । जसको नेतृत्व उपमहासचिव प्रभाकरले गर्ने छन् ।
रुकुम पश्चिमका पीडितको लागि अस्थायी आवास निर्माण गर्न जिल्लाको सिंगो पार्टीलाई स्वयंसेवक दलमा रुपान्तरण गर्ने निर्णय यसअघि गरेको थियो ।
चिसो बढ्दै गएपछि युद्धस्तरमा लागेर त्रिपालमुनी रात काटिरहेका पीडितलाई एकहप्ता भित्र अस्थायी आवासमा बसाल्ने माओवादीको योजना छ ।
प्रभाकर भूकम्प गएको अर्को दिनदेखि जिल्लामै खटिरहेका छन् । स्वयंसेवक टोली आठबिसकोट नगरपालिका र सानीभेरी गाउँपालिकाका पीडितको लागि आवास निर्माण गरिरहेको छ । यहाँका पीडितलाई अस्थायी आवासमा बसालेर अन्य ठाउँमा जाने माओवादी केन्द्र रुकुम पश्चिमले जनाएको छ ।
टोली विहानदेखि साँझ अबेरसम्म अस्थायी आवास निर्माणमा खटिने बताइएको छ ।
जिल्लाभरी तीन हजार ८७ जना परिचालन गर्न लागेको प्रभाकरले जानकारी दिए ।
भूकम्पमा परी जाजरकोटमा १०१ जनाको मृत्यु र १४५ जना घाइते भएका छन् भने रुकुम पश्चिममा ५४ जनाको मृत्यु र २०२ जना घाइते भएका छन् । त्यस्तै, जाजरकोटमा ३४ हजार ५०१ वटा घरमा क्षति पुग्दा रुकुम पश्चिममा २६ हजार ५३१ घर क्षतिग्रस्त भएको जिल्ला प्रशासन कार्यालयले जनाएको छ ।
