अनलाइन डबली
काठमाडौं । नेकपा (माओवादी केन्द्र) ले आफ्ना नियमित र पूर्वघोषित कार्यक्रम रोकेर भूकम्प पीडितको उद्दार-राहत र पुनर्स्थापनामा जुटेको छ । पार्टी अध्यक्ष समेत रहेका प्रधानमन्त्री प्रचण्ड भूकम्प प्रभावित जाजरकोट र रुकुम पश्चिम पुगेर पीडितको उद्दारमा १८ घण्टा बिताएका थिए ।
पार्टीका उपमहासिचव प्रभाकर र शक्तिबहादुर बस्नेत पनि पीडितको उद्दार तथा राहतमै खटिएका छन् । ऊर्जामन्त्री समेत रहेका बस्नेत प्रधानमन्त्रीसँगै गएर उद्दारमा खटिएका थिए । बस्नेत जाजरकोटबाट निर्वाचित सांसद हुन् ।
माओवादी केन्द्रले जारी अभियानलाई रोकेर भूकम्प प्रभावित क्षेत्रमा जनशक्ति परिचालन गरेको छ । माओवादी नेता कार्यकर्ताहरु भूकम्पले भत्काएका घरहरु पुननिर्माणमा जुटेका छन् ।
महासचिव देव गुरुङका अनुसार आइतबार बसेको पदाधिकारी बैठकले गत शुक्रबार जाजरकोटमा गएको भूकम्पको कारण सडक संघर्षलगायतका कार्यक्रम स्थगित गरिएको छ ।
‘भूकम्प प्रभावित क्षेत्रमा खटिनु छ । रूपान्तरण अभियानअन्तर्गत काठमाडौंमा गर्न लागिएको जनपरिचालन कार्यक्रम उक्त मितिमा नगर्ने निर्णय गरिएको छ’ महासचिव गुरुङले भने ।
यसैगरी माओवादीले भूकम्प प्रभावित जिल्लाका सम्पूर्ण कमिटीहरु जवसरमोर्चाका नेता तथा कार्यकर्ताहरुलाई खोज, उद्दार एवं राहतमा सक्रियतापूर्वक सहयोग गर्न निर्देशन दिएको छ ।
केन्द्रको निर्देशनपछि कर्णाली प्रदेश पार्टी अभियानात्मक रुपमा पीडितको उद्दार-राहत तथा पुनर्स्थापनामा जुटेको छ ।
