![](https://onlinedabali.com/wp-content/uploads/2023/11/Bhukamp-putin-xi-dabali.jpg)
काठमाडौं । छिमेकी जनवादी गणतन्त्र चीन र रुसी संघले नेपाललाई संकटमा साथ दिने बताएका छन् । रुसका राष्ट्रपति भ्लाीदीमीर पुटिन र चीनका राष्ट्राध्यक्ष सी चिनफिङले गएराति गएको भूकम्प प्रभावितलाई सहयोग गर्ने बताएका छन् ।
पुटिनले राष्ट्रपति रामचन्द्र पौडेललाई पत्र लेखेर नै भूकम्पबाट भएको धनजनको क्षतिप्रति गहिरो दुःख व्यक्त गरेका छन् । पुटिनले प्राकृतिक विपत्तिको यस दुःखद घटनाबाट पीडित नेपालीप्रति गहिरो संवेदना प्रकट गर्दै सहयोग गर्ने प्रतिवद्धता जनाएको राष्ट्रपति कार्यालयले जनाएको छ ।
राष्ट्रपति पुटिनले भूकम्पबाट पीडितहरुका आफन्त तथा शुभेच्छुक नेपाली जनताप्रति आफ्नो साथ, सहयोग र सहानुभूति रहेको उल्लेख गर्दै घाइतेहरुको शीघ्र स्वास्थ्य लाभको कामना पनि गरेका छन् ।
त्यसैगरी राष्ट्रपति सीको निर्देशनमा चीनले १० करोड नेपाली रुपैयाँ बराबरको राहत सामग्री सहयोग गर्ने घोषणा गरेको छ ।
नेपालका लागि चिनियाँ राजदूत चेन सङका अनुसार साउथ एसियन कन्ट्रीज इमरर्जेन्सी सप्लाइज रिजर्भबाट सो सहयोग गर्न लागिएको हो ।
राहत सामग्रीमा टेन्ट, ब्ल्याङ्केटलगायत सामग्रीहरू रहेका छन् । ती सामग्री केही दिनमा नेपाल आइपुग्ने बताउँदै उनले थप राहत पनि घोषणा गरिने बताएका छन् ।
यसअघि २०७२ सालमा गएको भूकम्पमा पनि नेपाललाई दुबै देशले सहयोग गरेका थिए ।