अनलाइन डबली
काठमाडौँ । इजरायल युद्धमा फसेका विद्यार्थीहरुले आफूलाई उद्दारको माग गरेका छन् । शनिबार विहान हमासले हमला गरेपछि सुरु भएको युद्धमा फसेका नेपाली विद्यार्थीहरुले आफूहरुको अवस्था नाजुक रहेको बताउँदै प्रधानमन्त्री प्रचण्डलाई उद्दारको लागि अनुरोध गरेका छन् ।
युद्धमा १० जना विद्यार्थीहरुले ज्यान गुमाइसकेका छन् भने अझै केही फसेका छन् । नेपाली विद्यार्थी सुरज भण्डारीले बंकरभित्रैबाट प्रधानमन्त्री प्रचण्डलाई पत्र लेखेर उद्दारको लागि अनुरोध गरेका छन् । त्यसैगरी पाँच जनाको तर्फबाट विपिन सुवेदीले पनि भिडियो सन्देश पठाएर आफूहरुलाई उद्दार गर्न अनुरोध गरेका छन् ।
उनीहरुले आफूहरुले आँखै अगाडि १० जना गुमाएको र केही सम्पर्कविहीन भएको तथा घाइते भएको बताएका छन् । सुदूरपश्चिम विश्वविद्यालय कृषि विज्ञान संकायका विद्यार्थीहरूले उद्दारको लागि चाँडो पहल गर्न सरकारसँग माग गरेका छन् ।
विद्यार्थी विपिन सुवेदीले भिडियो सन्देशमा तीन दिनदेखि मानसिक र शारीरिक पीडाबाट गुज्रिरहेको भन्दै आफूहरूको अवस्था निकै नाजुक रहेको बताए । उनले शनिवारदेखि बंकरभित्रै लुकेर बसेको बताएका छन् ।
“हामी ५ जना छौँ । घरकालाई तनाव हुन्छ भनेर भिडियो नबनाउने पक्षमा थिए । तर, घरभन्दा माथि उठेर देशले केही नगरेको अवस्थामा यो भिडियो बनाउन विवश छौँ । यो बङ्कर हो । यो बंकरमा बस्न थालेको तीन दिन भयो । एम्बेसीले उद्धार गर्छ कि भनेर हामी लुगा लगाएर बसिरहेका छौँ । हामी रातभरि बंकरमाथि मिसाइल खस्दा निकै डर लाग्छ । हामीले १० जना साथी त गुमाइसकेका छौँ । हामी पनि गुम्छौँ कि भन्ने डर छ । १० जनाको साथीको त्यो चिच्याहट, हामीलाई गरेको हार गुहार, सुनेर रातभरि निद्रा लाग्दैन” सुवेदीले भिडियोमा भनेका छन् ।
सुरज भण्डारीले प्रचण्डलाई लेखेको पत्रः
